بالتحديد

* أول الكلام.. ربنا.. ظلمنا أنفسنا وأن لم تغفر لنا وترحمنا لنكونن من الخاسرين.. صدق الله العظيم.
* هو إيه اللي بيحصل بالضبط في النادي الإسماعيلي.. المحافظ.. مجلس الإدارة.. المجلس القومي.. إيه الحكاية.. الحكاية مش ناقصة انهيار الإسماعيلي كمان.
* ممكن حد يفهمني.. هو فيه لاعب برازيلي ممكن يحترف بعيد عن أوروبا.. أو أمريكا اللاتينية.. أو في دول الخليج.. انما يحترف في مصر.. فتش عن المصدر.. وان معرفتش أنا أقولك الباقي.
* يا تري يوم الاثنين اللي جاي.. ح يتم إلغاء الهبوط.. ونظام الدوري ح يبقي مجموعتين.. ورؤساء اللجان ح يتغيروا.. ياريت.. ياخبر النهاردة بفلوس.. بكره يبقي ببلاش..
* حد يقولي.. الكأس امتي.. واللي مش ح يلعب.. ما يلعبش.. المسابقة.. مش علي مزاج ناس.. وناس.
* يا عيني علي الأندية الشعبية أو أندية الغلابة قاعدة تبيع في ولادها وبعد كده تدوق المر علشان تلعب في الممتاز.. بأمارة إيه.. سلمولي علي الملايين.
* في اتصال مع أحد الوزراء قال لي بالحرف الواحد. مين يقدر يلعب علي بطولة واللقب في حكم احتكاري.. كل الأندية مكتوب عليها اللعب.. وليس المنافسة زي حديد عز سابقا.. علشان كده فتح بيع النجوم لأعلي سعر وليس لشراء أي لاعب.. لأن بصراحة البطولة مش جايبة همها.. لكن دوري المحترفين احتمال الوضع يتغير.. ربما.
* بلغت صفقات الأهلي في فصل الصيف حوالي 50 مليون جنيه مرة واحدة.. علي إيه معرفش.. بداية من السيد حمدي 8 ملايين وجونيور 7 ملايين وفي الطليعة 5 ملايين محمد نجيب واخري لأحمد دويدار و 12 مليوناً لوليد سليمان ده غير أحمد شديد قناوي.. وعبدالله السعيد و.. و.. يا خسارة.. حد يسيب أمير سعيود.. معلش يا ابني ربنا يوفقك.
* وبعدين في لعبة القط والفار في تنافس الأهلي مع الزمالك في رفع أسعار اللاعبين.. ولا هية الحكاية من يملك الملايين.. كفاية بقي حرام عليكم.
* بداية المشوار الأحمر في دوري الأبطال لم يكن علي المستوي المطلوب أوالمأمول.. رغم أن الوداد من الفرق التي كان يمكن تجاوزها عن طريق الريموت..لكن تقول إيه للدفاع والحارس والوسط والسيد حمدي.. يا جوزيه.
* تصريح قاله طارق يحيي يأمل فيه المنافسة علي الدرع الموسم القادم.. وأنا أقول له ابقي قابلني.. إذا كنت خسرت المركز الرابع الذي تستحقه بجدارة بسبب 7 دقائق.. يبقي بتحلم بالدرع.. ربنا يوفقك.
* مبروك عودة غزل المحلة.. بصراحة الفلاحين وحشونا.. عقبال الترسانة والمنصورة والاولمبي.. ويارب.. يارب.. يلغي الهبوط علشان الاتحاد سيد البلد.
* وبعدين في مجلس الزمالك السنة بتجري.. والمئوية قربت.. والمباراة الكبري اخبارها إيه.. ياريت بعد ال 25 مليون الرعاية مايطيروش في الصفقات.. كفاية عليكو المعلم والعميد الجديد وعبدربه و.. و.. و.. علشان تقدروا توصلوا لنهاية الموسم.
* اخر الكلام.. ربنا لا تجعلنا فتنة للقوم الظالمين ونجنا برحمتك من القوم الكافرين. صدق الله العظيم