طلاب حقوق القاهرة غاضبون من الخيام

في أول يوم امتحانات..

و"زمزم": نحن في الحر سواء
سادت حالة من الغضب والاستياء لطلاب كلية الحقوق الذين أدوا أول امتحاناتهم أمس السبت، داخل الخيام التي أقامتها جامعة القاهرة، بملاعب المدينة الجامعية ودشنوا هاشتاج باسم "ضد الخيم"، و"رجعوا طلبة حقوق تمتحن في القاعات"، عبر موقع التواصل الاجتماعي "فيس بوك".
وأضاف الطلاب عبر صفحاتهم على "فيس بوك" إحنا مش الفرقة الرابعة بس إحنا أربع فرق (أولىي، ثانية ثالثة، رابعة) كلنا واقع علينا الضرر كلنا هنمتحن في مكان غير آدمي كلنا لازم نرفض ده ونشير ونوصل لكل الناس، الفكرة أن مينفعش أي طالب حقوق أو غيره يمتحن في مكان ده، في حلول كتير للجامعة تحل بيها المشكلة لكن أية مشكلتنا إحنا نمتحن في مكان لا يليق بجامعة ولا آدمي أصلا".
وعبر الطلاب عن غضبهم الكبير على الحساب الشخصي للدكتور عبد المنعم زمزم وكيل كلية الحقوق لشئون التعليم والطلاب وقال أحد الطلاب "أنا آسف يا دكتور ومع احترامي لحضرتك أسوأ قرار اتخذته السنة دي بخصوص الامتحانات هو الخيام اللي اتعملت أنا مش هقول حضرتك الجو صعب أو الامتحان صعب أو الميعاد اتغير رغم أننا بقالنا 4 سنين نمتحن الساعة 3 بس هقول لحضرتك المكان ده لا يوجد به تركيز الذي يحتاجه الطلاب ده غير قلة الأدب اللى بتحصل وكلام الناس فى الميكروفون اللي بنسمعه ودوشة الشارع ودوشة اللجان اللى جنبنا.
فيما قالت إحدى الطالبات: "أنا مش عارفة أيه اللي بيتعمل فينا ده أكتر كلية مفيهاش أى حاجة إيجابية أنا واحدة من الناس موافقة افطر فى الشارع بس متعرضش للإهانة ولا دقيقة وانتوا لغيتوا الوقت بتاعنا الطبيعي مش عشانا إحنا انتوا لغيتوا علشان الموظفين مش هيرضوا يراقبوا ما هوه مش معقول عشان شوية موظفين إحنا نروح فى داهية أنتم بتفكروا فى أنفسكوا قبل ما تفكروا فينا بجد حرام عليكم".
من جانبه قال الدكتور عبد المنعم زمزم، وكيل الكلية لشئون التعليم والطلاب،:" للمتذمرين من الخيام نحن معكم فى نفس المكان وفى نفس الزمان، والجو قاسى علينا وعليكم، بل على العكس نحن نقف طوال الوقت وبنلف علي اللجان".
وأضاف زمزم عبر صفحته على موقع التواصل الاجتماعي "فيس بوك" يومنا يبدأ من 5 صباحا بطبع الامتحان وينتهي 2 ظهرا للانتهاء من أعمال الكنترول"، مشيرًا إلى أن هذا الأمر ظرف استثنائي هذا العام بسبب رمضان، وأنه وللأسف الخيام هى الحل الوحيد، على أن نطلب العام القادم الرجوع للقاعات ليتحمل عبء الخيام الكليات التى تمتحن فى القاعات الآن، مطالبًا الطلاب أرجو بتقدير طبيعة الظرف.