رئيس جامعة القاهرة : جامعتنا ليبرالية ممنوع فيها التدين..!

أنصفت محكمة القضاء الإداري المصرية الطالبات المنتقبات، وأصدرت حكما بإلغاء القرار الظالم الذي اتخذه الدكتور هاني هلال وزير التعليم العالي، والدكتور أحمد زكي بدر رئيس جامعة عين شمس، الخاص بمنعهن من دخول المدينة الجامعية، وقضت بأحقية الطالبات اللاتي يرتدين النقاب، في دخول المدينة والإقامة بها.
وكانت بعض الطالبات المنتقبات رفعن قضية ضد وزير التعليم العالي، بعد أن تم منع بعضهم من دخول الامتحانات، وصدر حكم يوم الأحد لصالح واحدة منهن، حيث استندت المحكمة في حكمها، إلى الأحكام السابقة المشابهة، التي أصدرتها المحكمة الإدارية العليا، وقالت فيها إن النطاق يدخل في إطار الحرية الشخصية، ما لم يخل بالنظام والآداب العامة.
مستعدين "نتفتش"
وقد حصلت صحيفة الشعب على نسخة من حوار أجراه وفد من الطالبات المنتقبات مع رئيس جامعة القاهرة، سخر فيه من شرع الله وتهجم على الطالبات المنتقبات وتوعدهن بالاضطهاد حتى يخلعن النقاب أو يغادرن التعليم نهائياً.
وقالت إحدى الطالبات رفضت ذكر اسمها:"يعلم الله كم تحرينا من الدقة فى نقل ما حدث بين الطالبة والدكتور وكل الجمل التى تم ذكرها تم كتابتها بالنص".
وأضافت:" نرجوا من جميع طلاب جامعة القاهرة أن يتضامنوا معنا نظرا للظلم الواقع علينا وأن يمتنعوا عن أداء الامتحانات إلا بدخول المنقبات بزيهم"، وتابعت :"قال صلى الله عليه وسلم: "من لم يهتم بأمر المسلمين فليس منهم".
نص الحوار
الطالبة: عايزين نعرف من حضرتك أية موضوع الإعلانات اللى اتعلقت فى كليتنا بمنعنا من الامتحانات؟؟
- رئيس الجامعة د. حسام كامل: آه فعلا القرار اللى خدناه بينص على منع المنتقبات من دخول الامتحانات.
-الطالبة: بس ممكن نعرف من حضرتك إيه السبب؟
- د. حسام: عشان نمنع ظاهرة الغش بالبلوتوث ونتأكد إن مفيش حد بيمتحن مكان حد.
- الطالبة: إحنا يا دكتور مستعدين نرفع النقاب لأى مراقبة عشان تتأكد من شخصياتنا فى أول اللجان، وحكاية السماعات مكن أى بنت عادية لابسة خمار أو إيشارب عادى تستخدمها لأن السماعة مش بتتحط فى الوش!! ومع ذلك حفظا لحق الجامعة إحنا مستعدين نتفتش قبل اللجنة.
- د. حسام: بصى فى قرارين خدتهم ومش هرجع فيهم منع النقاب فى المدينة وفى قاعات الامتحانات ولو عايزين ترفعوا قضية ارفعوا.
- الطالبة: طب يا دكتور ننفذ القرار بس فى لجنة يشرف عليها مراقبات.. عشان بس نرضى جميع الأطراف؟؟
- د. حسام: أنا مش هعدل فى القرارات عشان تنسابكوا، والمفروض إن انتوا تنفذوا القرارات زى ما هية ومش فرض عليه اعملكوا لجان خاصة وبعدين شيخ الأزهر قال إنه مش فرض.
الطالبة: بس يا دكتور إحنا عقيدتنا القرآن والسنة ومش معنى إنه مش فرض إننا نمنعه خالص.
- د. حسام: أنا رجل مسلم، بس متكلمنيش فى الدين.. ابعدينى عن أى جدل دينى ده مش اختصاصى.. إحنا جامعتنا جامعة ليبرالية حرة.
- الطالبة: بس يا دكتور حضرتك كده مسبتش مجال للحرية خالص ولا حتى الحرية الشخصية.
- د. حسام: ما انتى فعلا حرة تلبسى أى حاجة انتى عايزاها بس النقاب لا.. وبعدين بقى انتى عايزة رأى الشخصى؟
الطالبة: اتفضل يا دكتور.
- د. حسام: النقاب ده تخلف وأنا مش هاسمح بالتخلف ده لغاية ما تنحدر الجامعات عندنا وتبقى زى جامعات السعودية، وكفاية إنى بسمح لكم بالدخول من الأبواب لأن فيه قرار من المحكمة الدستورية العليا سنة96 يمنعكوا من الدخول. (ملحوظة تم تعديل هذا القرار).
الطالبة: طب حضرتك شفت اية من المنقبات يدل إنه تخلف.. يعنى يا دكتور إيه مظاهر التخلف اللى حضرتك شفتها!!!!
- د. حسام: انتى شكلك كده وانتى ماشية فى الشارع ده تخلف والناس بيضحكوا عليكى وأنا مش هاسمح إن جامعتنا تكون نسخة من الجامعات السعودية.
الطالبة: بس يا دكتور مش حضرتك قلت إن مفيش مشكلة إن إحنا ننزله بعد ما نخرج من اللجنة.
- د. حسام: آه فعلا.
الطالبة: بس حضرتك كده ممنعتوش يعنى بردوا هتبقى طالبة منتقبة وماشية فى الجامعة ايه لازم أن هيه تفضل طول الامتحان من غيره مع إننا اتحققنا من شخصيتها؟
- د. حسام: ما أنا بضيق عليكوا وهفضل أضيق عليكوا لغاية ما أمنعه خالص.
الطالبة: بس يا دكتور صعب إن فرد واحد -بناء على رأيه الشخصى- ياخد قرار زى ده لازم حضرتك تدينا مبرر.
- د. حسام: أنا مش محتاج أديكوا مبرر وبعدين القرار ده اتاخد كمان من المجلس الأعلى للجامعات اللى برئاسة د. هانى هلال يعنى القرار قرر سارى على كل الجامعات مش القاهرة بس.
الطالبة: بس حضرتك يا دكتور أب وأكيد عندك أولاد زينا ومش هيرضيك ضياع مستقبلنا.
- د. حسام: حولى أى كلية تانية (ملحوظة: القرار اتاخد فى كل الكليات).
الطالبة: شكرا يا دكتور وآسفين لو أثقلنا على حضرتك.