أهالى طنطا: الموتى بيشتكوا للسيسى ومفيش فايدة

تسيطر حالة من السخط والغضب على سكان منطقة عوارة وأهالى المتوفين بمقابر المنطقة التابعة لحى أول طنطا بمحافظة الغربية بسبب غرق المقابر بمياه الصرف الصحي إلى جانب انتشار القمامة بالمنطقة فضلاً عن انبعاث الروائح الكريهة ليصبح أمامنا موتى فقدوا حقهم فى مدفن كريم.
يقول خالد حسن أحد سكان منطقة عوارة: إحنا اتصلنا بالمسئولين بشبكة مياه الشرب والصرف الصحى وبيوعدونا كل مرة أنهم هيجوا ويحلوا المشكلة دون تقديم حلول.
وأضاف إسماعيل محمد موظف بالبريد أننا أرسلنا العديد من الشكاوى للمسئولين على رأسهم المحافظ أحمد ضيف صقر رئيس مركز طنطا رئيس حى أول طنطا ولكن دون جدوى.
وأوضح أننا لو كنا فى قرية كنا جمعنا من بعض وحلينا المشكلة أما دى مدينة والمنطقة كبيرة والمقابر يوميا بيدفن فيها أكتر من 5 أشخاص والناس بتتبهدل وهى راحة تدفن لازم حل .
وفى سياق متصل صرخ عم حامد مزارع قائلاً: "انجدونا يا حكومة إحنا مستنيين بيوتنا تقع فوق راسنا، مش هنقولكم تعالوا إلحقوا الميتين واتقوا حرمتهم إلحقونا إحنا لأن الحى أبقى من الميت".
وتابعت أم محمود بائعة روبابيكيا: "الحال ده مايرضيش مسلم ولا كافر إن واحد ييجى يدفن أبوه وييجى بعد أسبوع يلاقى أبوه غرقان فى ميه جوه تربته وإبراهيم التربى راح اشتكى وقالوله هنشفط الميه ونصلحها تانى يوم العيد ومش عارفين العيد بتاعهم ده هييجى امتى لحد دلوقتى".
واستغاثت بالرئيس عبد الفتاح السيسي: الحقنا يا سيسى وحاسب المسئولين اللى بيهملو فى شغلهم عشان نفضل نحبك وندعمك".