إعلاميون إنقلبوا على السيسي وهناك شخص يحميهم

سيد علي:

هاجم المذيع سيد علي ، بعض الإعلاميين الذين انتقدوا قرار الرئيس عبد الفتاح السيسي بعزل المستشار أحمد الزند من منصبه بعد رفضه الاستقالة .
وقال "علي" : كنت متخيل لحد إمبارح ان فيه مجموعة كدة متحدثة بإسم الرئاسة ومتلزقة في الرئاسة وتطلع تتكلم باسم الرئاسة ، وكنا بنشوف الكلام دة واحنا قاعدين ساكتين لأن الرئاسة ساكتة على دة وهما بيتنططوا على حس دة .. لحد ما اكتشفت امبارح أن الناس دي بتنقلب على الرئيس .. وطالعين على الهوا يقولوا "ازاي الزند يمشي" .. متسائلاً: في ايه؟ بدل ما تقول كدة هاجم الرئيس السيسي على طول .. اللي معين الداخلية والدفاع والخارجية والعدل هو الرئيس عبد الفتاح السيسي .. انت مع 30 يونيو وقائدها عبد الفتاح السيسي ولا انت عندك مجموعات تانية بتحتمي بيها؟
وأضاف: انا مش متخيل انك لعبت دور في 25 يناير و 30 يونيو فتيجي تقول هات التمن .. مش من حقك .. دة حق الشهداء والمصابين .. مين يجيب حقهم إذا كان كل واحد في حضراتكم قام بدور في 30 يونيو او 25 يناير عايز التمن مقدمًا .. انتوا وطنيين بالاجرة بدليل أن "فيها لاخفيها " كلكم بلا استثناء .. ولما تبقى قريب من صاحب القرار بتطبل وتزمر وترقص .. ولما صاحب القرار يبعدك شوية أو يولي حد تاني عليك فانت تحاربه .
وتابع : هل دة معقول بجد؟ انتوا انتمائكم لمين بالظبط؟ اللي حصل اول امبارح وامبارح كلام بيجرح في وطنية ناس كتير جدا ويضع علامات استفهام حول انتماءات الناس دي .. اللي انتوا بتعملوه دة اسوأ من "الاخونة" ولا انتوا مفيش حد يكلمكم؟ ولا انتوا مفيش كبير يلمكم؟ .. كلكم بلا استثناء .. انت تحتمي في شخص مش بتحتمي بمبادئك ولا برئيسك "بحسب قوله"
الفيديو: