مواطنون ل"محلب": "بطل هزار"

بعد دعوته لعمل الشباب على توك توك..

أثارة تصريحات المهندس إبراهيم محلب رئيس الوزراء، عن عدم توفر أية وظائف فى الحكومة لشباب الجامعات غضب الكثير من الشباب داعيًا إياهم التوجه إلى العمل فى الحرف اليدوية مثل النجارة وسواقة التكاتك، قائلًا: "مفيش وظائف فى الحكومة وإللى عاوز عمل يشتغل فى النجارة أو سواق توك توك وميفكرش يفتح كافى شوب ".
رصدت "المصريون" آراء المواطنين وخاصة خريجي الجامعات تعليقًا على تصريحات رئيس الحكومة والتى جاء أغلبها منتقدًا هذه التصريحات مطالبين بتوفير فرص عمل للشباب فى المجالات الدراسية التي تخصصوا فيها.
وقال محمود على، طالب جامعي:" أغلبية الشباب شغالين على تكاتك بس وقت مهخلص تعليم مش هشتغل على توك توك وبقوله بطل هزار وشوف قرارات تانية ".
بينما واجهنا أحد الخريجين رفض ذكر اسمه، منتقدًا التصريحات بشدة، قائلًا:" والله مهعلق مش هقول حاجة انا زعلان من الكلام ده "
وقال عبد الرحمن أحمد، حاصل على بكلوريوس تجارة، ويعمل سائق توك توك ،:" مش موافق اشتغل على توك توك الدنيا مفتوحة وفى شغل فى الحكومة لكن مفيش تعيين غير اللى معاه واسطة وده مش عدل فى تمييز بين أفراد الشعب وبعدين المفروض يرخص الأول التكاتك قبل دعوة الشباب المتعلمين مؤهل عالي للعمل عليها".
وعلق مصطفى السيد، حاصل على دبلوم فني، قائلًا:" التوك توك بناكل منه عيش أنا معايا دبلوم وبنأجر التوك توك ب 100 جنيه فى اليوم وباخد الزيادة علي الأجرة، لكن الغرامة الواحدة بندفعها 1500 جنيه عاوزين نرخص يابشمهندس محلب فى 3 مليون توك توك فى القاهرة بيعمل عليههم 6 ملايين شاب بخلاف الخدمات فى حرف الميكانيكا والكاوتش والتجار وقطع الغيار يعنى مينفعش محافظ القاهرة يقول مش هنرخص التكاتك ورئيس الوزراء يقول اشتغلوا عليها ؟! ".
وتابع:" مش معقول اتعلم واتعب وأهلى يصرفوا عليا ويكون معايا مؤهل عالي واشتغل على توك توك كمان التوك توك ب 27 ألف جنيه هنجيبهم منين ومفيش ترخيص وبتتسرق مننا ومش بنعرف نرجعها تاني ".
وانتقد صالح البر، دعوة رئيس الوزراء، قائلًا:" مفيش شغل فى الحكومة نروح نشتغل فى القطاع الخاص بيذلنا ب 900 جنيه فى الشهر ومفيش تأمينات ولا أي حقوق ومفيش رقابة من الحكومة عليه".