«داليا مشاكل»: البنت اللى تسوق «توك توك» وماتشيلش مطوة.. يبقى عليها العوض

كل من فى موقف التكاتك فى صفط اللبن يعرفها، فهى الفتاة التى عملت فى أكثر من مهنة وعندما فشلت انضمت إلى سائقى التكاتك فى تلك المنطقة لتكون أول فتاة تعمل سائقة توك توك، «داليا مشاكل» كما يسمونها أو «غزال» كما ينادونها أحيانا، عملت فى محل ملابس ثم عملت طباخة فى إحدى الشركات وجزارة أيضا فى مواسم عيد الأضحى، قررت أن تعمل فى هذه المهنة لتساعد أسرتها، فمبدأها فى الحياة أن المهنة المحترمة التى تدر دخلا وفيرا أفضل من القعدة فى البيت ومفيش حاجة اسمها راجل وست.
السائقون من زملاء داليا سموها «داليا مشاكل» لأنها كثيرا ما تثير مشاكل مع السائقين والزبائن، لأنها عصبية ولا تحتمل أن يتجاوز أحد ضدها: أنا باشتغل فى وسط رجالة وفى مهنة صعبة ولو لم أكن شرسة ومحددة مع الآخرين سأتعرض لمشاكل كثيرة أنا فى غنى عنها.
«داليا» التى تبلغ من العمر 20 عاما، تروى قصتها مع التوك توك قائلة: من حوالى سنة أمى اشترت لأخويا الصغير توك توك يشتغل عليه، لكن بعد فترة العيال فى الشارع ضربوه وخدوا فلوسه وكسروا التوك توك، فاضطرينا نبيعه عشان مانخسرش، ساعتها فكرت أسوق توك توك، رحت اركبه مع إنى مش باعرف أسوق، لكن ماعرفش سوقته إزاى، ومن يومها قررت أشتغل عليه، وبعد ما بيعنا التوك توك بتاعنا، بقيت أشتغل على توك توك بتاع واحد من المنطقة وباكسب فى اليوم من 40 ل50 جنيه، ببدأ شغل الساعة 3 العصر وباخلص الساعة 1 أو 2 بالليل».
كثرة التعليقات التى تسمعها والمواقف التى تتعرض لها داليا جعلتها تفكر فى طريقة للتخلص من مضايقات الشباب لها، قائلة: لأنى بافضل فى الشارع لوقت متأخر ولأن معظم الزباين والسواقين بيستضعفونى، وباسمع كلام من الشباب فى الموقف يؤذى أى بنت، قررت أحتفظ فى جيبى بمطوة باطلعها قدام أى حد يحاول يعلق أو يضايقنى وطبعا بيخاف ويجرى، والمطوة دى ليها استخدام تانى لما أى حد يحاول يتعرض لى بالليل».
موقف غريب تعرضت له داليا أثناء توصيلها أحد الزبائن ليلا، لكنها استفادت منه كثيراً: مرة واحد ركب معايا قالى نزلينى عند الورش ولما جت الورش قالى ينفع تنزلينى عند الجامع اللى قدام، بعدها قالى أنا مش عاوز أنزل، أنا شاب لذيذ وانتى شابة لذيذة واليوم لذيذ رحت مطلعاله المطوة وقلتله لو مانزلتش هجيب كرشك، ولقيته جرى قدامى ومن يومها مابعرفش أآمن لحد خالص.
عملها كسائقة توك توك لا يؤثر على إحساسها بأنوثتها فهى مقتنعة تماما بأن لكل مقام مقالاً، «فى الشغل ممكن ألبس بنطلون وتى شيرت وممكن عباية واسعة لكن فى الخروج مع أصحابى البنات بالبس جيبة، أو بادى وفستان، ولما السواقين بيشوفونى نازلة بيقعدوا يقولوا مش معقول إنتى داليا بتاعت التوك توك؟!».