من غير زعل

* "دلع" المهاجم البرازيلى فابيو جونيور وتأخره فى الرجوع إلى مصر رغم انتهاء إجازته ليس من فراغ فهو يدرك أنه مسنود على جوزيه اللى بصراحة شرب الأهلى "مقلب كبير قوى" بهذا اللاعب اللى آخره كان "بيجمع كور" فى البرتغال , لأن ما قدمه يعكس أنه متواضع الإمكانيات, يا خوفى ليكون سواق جوزيه فى البرتغال اللى بيودى عياله المدرسة وجايبه "تخليص حق " بس العيب مش على جوزيه العيب على القيعى مهندس صفقات الأهلى اللى سمح بالمهزلة دى , عيب يا جماعة ده الأهلى مش فريق شباب مركز " كوم الدكة" .
* النكتة التانية فى البنينى رزاق أوموتويوسى مهاجم الزمالك اللى بيتأخر عن تدريبات الصبح لأن سيادته مش واخد على الصحيان بدرى , أكيد " التكية" اللى لقى فيها " أكل ومرعة وقلة صنعة" تخليه يعمل أكتر من كده , طيب ده لو كان فى نادى خليجى بلاش أوروبى شوفوا كانوا عملوا فيه إيه , عيب ده الزمالك مش مركز شباب بيلا , مع كل احترامى لشباب كوم الدكة وبيلا .
* حازم باشا إمام مقموص وزعلان وعاوز يروح السعودية عشان فلوسه متأخرة , ألف سلامة والقلب دعيلك , بس أهى دقنى لو عمرت شهرين, مشكلة حازم إمام إنه نسخة من إبراهيم سعيد لاعب موهوب جدا ولكنه " مش مؤدب" ما بيعرفش يحترم الكبير وده ظهر فى موقفه الأخير مع مدربه إسماعيل يوسف .
* تمخض الجبل فولد فأرا . . هذا ما ينطبق على قرار رئيس الوزراء " المستقيل" عصام شرف بتكليف مدحت البلتاجى المدير التنفيذى للمجلس القومى للرياضة بتيسير أعمال المجلس خلفًا لحسن صقر . . كل القريبين من صقر كانوا عارفين إن الراجل لا بيهش ولا ينش وأن البلتاجى هو " الحاكم بأمره" يعنى جه عصام باشا شرف زى عوايده"يكحلها فعماها"
* يظل النجم الخلوق محمد أبو تريكة قيمة كبيرة , ربما يتراجع مستواه أحيانا ولكنه نموذج يحتذى به, الكل تابع كيف تحدث بأدب عن قرار استبعاده من المنتخب رغم أن واحد غيره كان يمكن أن يستغل نجوميته ويطلع فى 100 برنامج ويبهدل برادلى .
* ندرك جميعا أن الأمريكى بوب برادلى لن يحقق شيئا مع المنتخب – ليس تنجيما- ولكن كل النبوءات تؤكد فشله الذريع إلا أن البعض وللأسف يحملون أمانة الكلمة تعمدوا دفن هذه الحقيقة فى " مقبرة المصالح" خشية أن يفقدوا عزيزا غاليا هو " السبابيب" وعددًا من المنافع مع رئيس اتحاد الكرة سمير زاهر
البعض سيقول إن الحكم المسبق على برادلى " تجنى وظلم" خصوصًا أنه لم يظهر بعد إمكانياته الفنية لأن تجربة البرازيل لها ظروف خاصة وجاءت فى مرحلة دقيقة إذ يغير المنتحب جلده بعد " خيبة" عدم التأهل لأمم إفريقيا , إلا أن ما أظهره برادلى من تخبطات فنية وعشوائية فى اختيار اللاعبين يعكس قدراته المحدودة والتى قال عنها زاهر عندما تعاقد معه "إنه على قد فلوسنا" منكم لله وديتم الكرة المصرية فى داهية ولسة .
* ربنا يسهل ويهدى متعب ويركز مع الأهلى والمنتخب ويريحنا من مسلسله العاطفى مع الست يارا , ربنا يوفقه دى حياته الخاصة , بس مستقبلك يا كابتن , لو ركز متعب فى الكورة بس كان زمانه من أفضل مهاجمى العالم بس مفيش فايدة فى عقلية اللاعب المصرى طالما حط كام مليون فى البنك خلاص يبدأ الدلع واسألوا خالد بيبو فين ضيع موهبته
Hoss_vip66@yahoo