نجل بديع ل «حارقي سيارته»: «روحوا اتشطروا على اللي اداكم على قفاكم»

توجه بلال محمد بديع نجل المرشد العام لجماعة "الإخوان المسلمين" برسالة شديدة اللهجة لحارقي سيارته لم تخل من السخرية، قائلاً لهم: "روحوا اتشطروا على اللى آداكم على قفاكم" موضحًا أن السيارة ليست ملكه وإنما مقترضها من أحد زملائه، بحسب قوله.
وقال نجل بديع عبر صفحته على موقع التواصل الاجتماعي "فيس بوك": "طيب.. بما إن الموضوع أتنشر بقى يبقى ما فيش داعي نخبي حاجة.. شوية بلطجية جبانات - ربنا عالم باللي ف ضميري - حرقوا العربية اللي كانت سالفها - أيوه يا بهايم نأبكو طلع على شونة " مش فاهم يعني إيه بس هي بتتقال كده".. العربية مش ملكي و لا حاجة أنا كنت سالفها بس.. ربنا يخلف على صاحبها بالخير و يجعلها تذكرته للجنة".
وأضاف: "عمومًا هو لما سلفها لي كان عارف إن ده ممكن يحصل حاكم أنا سوابق ف موضوع العربيات اللي بتتحرق ده - العجيب و الغريب بقى إن شوية الجبانات دول يطلعوا يعلنوا مسئوليتهم عن حرق العربية ويسموا نفسهم "حق أولادنا في سينا" أو حاجة شبه كده"!!
وكان مجهولون أطلقوا على أنفسهم "حق ولدنا فى سيناء" ألقوا قنابل المولوتوف على سيارة نجل الدكتور محمد بديع، المرشد العام لجماعة الإخوان، أمام منزله بشارع 9بمنطقة بني سويف الجديدة ما أدى إلى احتراقها بالكامل.
وتوجه بلال إلى الجناة قائلاً: "يا شوية بهايم جبانات .. تاركم مش معايا ... ولا مع العربية اللي كنت سالفها" باكررهالكم تاني علشان أغيظكم - روحوا اتشطروا على اللي اداكم على قفاكم".
وتابع: "الجنود اللي بيتقتلوا ف كل حتة انتو مش قادرين تحموهم و لا قادرين تمسكوا اللي بيقتلوهم فعلا"!! انتو عاملين على رأي واحد قريبي زي واحد اترن علقة ف الشارع رجع البيت عمل فيها سبع البرمبة و قعد يزعق ويشخط وينطر!! طب يا سبع البرمبة ما تتشطر على اللي ضربك العلقة !! و لا انت عشان جبان بتتشطر على اللي انت عارف كويس إنه مسالم و مش هيرد عليك باللي تستاهله !! ولو انتو يا شوية جبانات فاكرين إنكو كده بتأذونا أو تضايقونا فبرضه نأبكو على شونة إحنا مش واطيين زيكو علشان تفرق معانا الحاجات الهايفة دي أو نتأثر بيها .. إحنا ناس باعت الدنيا كلها من زماااان .. من زمان قوي و مش حتة عربية اللي هنزعل عليها زي أسيادكم اللي مشغلينكم ما مقهورين على عربياتهم".
واعتبر أن "الأعجب والأغرب بقى لما تلاقي ناس مفروض إنهم ف حكم القرايب ناشرين حكاية حرق العربية دي عندهم بمنتهى السماجة و الصفاقة و السفالة ..و ناشرين إعلان شوية "الجبانات" دول مسئوليتهم عنها كأنهم شمتانين !! طب دي حاجة ظريفة خالص !!! يا ريت بقى لما تبقوا تشوفوني أو تشوفوا ولادي ما تبقوش تسلموا علينا و تعملوا فيها قرايبنا و كده !! و يا ريت كمان ماتورونيش وشكم أصلا" حاكم أنا للأسف ماليش ف شغل الطبطبة و المهاوده و الكلام بوشين فغالبا" هتشوفوا مني وش ما شفتوهوش قبل كده!.
واختتم: "بوست موجه يارب يوصل للي اقصدهم، اللي ييجي في الريش بقشيش، شوية جبانات!!! ربنا عالم باللي في ضميري".