شهادات دولية مضروبة

* * حسنين : شفت تصريح وزير التنمية الاداريه ؟. بيقول مصر من أحسن عشر بلاد فى العالم . دا حتى جريدة الجمهوريه عملت الكلام دا مانشيت .
= = = محمدين : لما يبقى ينجح فى مهمته الأساسيه . يبقى يتكلم فى مسألة مكانة مصر فى الخارج . ما هو الوزير المسؤل عن ملف الفساد وملف تبسيط اجراءات التعامل فى الجهات الحكوميه . إنت شايف إن فيه تحسن فى الموضوعين ؟
* * حسنين : بس إحنا والحمد لله عددنا كبير ودا ممكن يعمل لينا مكانه كويسه بالعالم . ياراجل إنت ناسى إن مصر أم الدنيا .
= = = محمدين : عددنا أصبح 84 مليون ونص . منهم حوالى 7 مليون فى الخارج و78 مليون جوا البلد . بس العدد دا يخلينا رقم 14 بين سكان العالم . صحيح إحنا أكبر دوله عربيه فى السكان . لكن إحنا رقم خمسه فى السكان بين البلاد الاسلاميه بعد أندونيسا وباكستان وبنجلاديش ونيجيريا .
* * حسنين : طب وفى المساحه الجغرافيه إحا فين بين دول العالم ؟
= = = محمدين : مساحتنا 1 مليون كيلو متر مربع . ودى تخلينا رقم ثلاثين بين دول العالم . وفيه عربية أكبر منا فى المساحة زى السودان والجزائر والسعوديه وليبيا وموريتانيا .
* * حسنين : لكن إحنا فى الاقتصاد مركزنا كويس . موش رئيس الوزرا قال إن إحنا متأثرناش بالأزمة العالميه . وكمان عملنا معدل نمو موجب السنه إللى فاتت ما حصلش إلا فى 3 دول بس .
= = = محمدين : شوف الإقتصاد بيتقاس بحاجه إسمها الناتج المحلى الاجمالى . ودا يعنى القيمة المضافه اللى عملتها البلد فى سنه . وعلشان تعرف يعنى إيه قيمة مضافه أو ناتج محلى .
تصور لو فيه صاحب ورشة أثاث اشترى خشب ولوازم نجاره بحوالى عشرين ألف جنيه . علشان يعمل أربع حجرات أثاث وبعدين باع الحاجات أللى عملها بثلاثين ألف جنيه .
فالفرق بين العشرين ألف جنيه والثلاثين ألف هى دى اللى بنسميها القيمة المضافه . يعنى الفرق بين تكاليف المبيعات وقيمة المبيعات . وزى كدا فى كل المجالات فى الزراعه الصناعة المقاولات التجاره وغيرها . بحيث الاجمالى يكون هو الناتج بتاع البلد .
* * حسنين : وفى الناتج المحلى دا إحنا مركزنا كام فى العالم ؟
= = = محمدين : السنه اللى فاتت مركزنا 42 بين دول العالم . والثالث بين العرب بعد السعوديه والامارات .
* * حسنين : أمال إيه حكاية معدل النمو الطفره اللى إحنا عملناه السنه إللى فاتت ؟
= = = محمدين : دى فشره من بتوع الدكتور نظيف . لما قال إن مصر ضمن 3 دول بس بالعالم عملوا نمو ايجابى فى العالم السنه اللى فاتت . تعرف إن فيه حوالى 110 دوله عملت نمو إيجابى السنه اللى فاتت . منهم 28 دوله عملت معدل نمو أعلى من إللى عملته مصر .
* * حسنين : وياترى اسرائيل ترتيبها كان كام ؟
= = = محمدين : اسرائيل ترتيبها 39 بين دول العالم . وخلى بالك أهم من رقم الناتج نصيب الفرد منه . يعنى إحنا فى مصر نصيب الفرد من الناتج المحلى الاجمالى 2070 دولار . ع
عارف دا يخلى ترتيبنا كام بالعالم رقم 147 فى نصيب الفرد من الناتج . فى حين نصيب الفرد من الناتج فى اسرائيل حوالى 26 ألف دولار فى السنه . وعلى فكره ترتيبها فى العالم رقم 46 فى قيمة نصيب الفرد من الناتج .
* * حسنين : وترتيبنا فى الصادرات ؟
= = = محمدين : فى الصادرات ترتيب مصر رقم 64 . وطبعا دا شامل نصيب الأجانب فى الصادرات البتروليه والسلع الأخرى . وترتيب مصر فى قيمة الورادات 48 . وطبعا المهم نوعية الواردات .
يعنى لما تستورد مواد خام وأنت تصنعها فى بلدك تعمل منها قيمة مضافه وتشغل ناس . لكن لو بتستورد سلعة جاهزه العمليه تفرق .
* * حسنين : وفى الاستثمار الأجنبى الواصل لبلدنا إحنا فين ؟
= = = محمدين : ترتيب مصر رقم 35 . وحط فى إعتبارك التلاعب إللى كان بيعمله محمود محى الدين علشان ينفخ الرقم . وإن الوزير الحالى للاستثمار ماشى فى نفس السكه بتاع النفخ للبيانات .
* * حسنين : نعم ! أمال الأونكتاد إللى بتعلن أرقام الاستثمار الأجنبى فى دول العالم نايمه ولا إيه ؟.
= = = محمدين : شوف كل المنظمات الدوليه زى البنك الدولى أو صندوق النقد الدولى أو منظمة التجاره العالميه أو الأنكتاد أو غيرها . مفيش حد منها بيعمل احصاءات داخل الدول . هما بيخدوا البيانات إللى الدول بتعطيها لهم .
ويحطوها فى جدول يطلع فيه ترتيب الدول . علشان كدا الترتيب ممكن يكون ملعوب فيه . بسببتقديم دول زينا بيانات مضروبه .
* * حسنين : يعنى بيانات التضخم والبطاله المكتوبه فى تقارير البنك الدولى وصندوق النقد الدولى مضروبه ؟
= = = محمدين : زى ما قلت لك هما ما بيعملوش قياس لأى بيانات فى أى دوله . مصر مثلا تقول لهم ان البطاله 9 % تكتبها 9 % . وتحطها فى جدول لنسب البطاله بدول العالم .فيطلع مركز مصر كويس بين دول العالم إللى فيها بطاله عاليه .
وزى دا نسب الفقر اللى بتحطها الحكومه وتقول إنها أقل من 20 % . ونسب التضخم ومعدلات النمو إللى ما حدش حاسس بيها .
* * حسنين : يعنى لما الوزير عثمان يقول معدل البطاله عندنا بينخفض . المؤسسات الدوليه دى تقول فى تقاريرها إللى بتنشرها إن معدل البطاله فى مصر بينخفض .
= = = محمدين : تمام .. علشان كدا الكدب بتاع الوزرا بتوعنا . بينقلوه للمنظمات الدوليه تاخده زى ما هو فى تقاريرها . ويطلع ترتيبنا كويس .فى التقارير بين دول العالم .
ورغم إن إحنا اللى طابخين البيانات هنا . تطلع الصحف القوميه تقول : شهاده دوليه لمصر .. البنك الدولى يشهد على تراجع البطاله والفقر فى مصر !
mamdouhec@maktoob.com