شاهد أخر كلمات ل"قتيلة الصيدلة"

تداول نشطاء عبر مواقع التواصل الاجتماعي "الفيس بوك" مقال لشهيدة مسيرات بني سويف بالامس والتي عرفت اعلاميا ب"قتيلة الصيدلة".
وتشير روفيدة في مقالها الأخير الذي كان من المفترض ان يتم نشره بمجلة الدفعة بكلية الصيدلة ببني سويف، إلى الوضع الذي تمر به مصر بطريقة مبسطة ، ساخرة من الاحداث ووصفت ما تعيشه مصر حاليا بانها "فيلم كبير ينتهي حسب مزاج المخرج"، حسب قولها.
وتقول روفيدة في المقال :" عارف تايتنك ؟ كلنا عارفينها ! السفينة دي كان عليها تقريباً 2230 واحد انقذوا منها تقريباً 706 يعني تقريباً 1500 واحد ماتوا في احداث الفيلم مات تقريباً اغلب الناس بسبب الغرق قبل ما حد يعرف ايه مصير البطل والبطلة".
البطل مات تقريباً بعد ساعات من غرق السفينة بسبب البرد وليس الغرق " ده في الفيلم " كل الناس الي اتفرجت ع الفيلم محستش بآي حاجه تجاه المئات الي بيموتوا ويغرقوا علي الرغم ان كان اغلبهم نساء واطفال.
وكان كل امنية الواحد وهو بيتفرج ع الفيلم ان البطل والبطلة ميمتوش ! البطل لو كان عاش ! كانت الناس هتخرج فرحانه انه تم انقاذه ! مسآلتش نفسك ليه مزعلتش على مئات الناس الي ماتت وزعلت اوي على موت البطل ده ؟ على الرغم البطل ده في الفيلم كان بيلعب قومار وكان بيشرب خمر وكان بيسرق وزنا وعمل كل حاجة غلط ، وفي الاخر بردو اتعاطفت معاه وزعلت لما مات ؟! على فكره هو مات في حادثة يعني " لم يقتل ! " عارف ليه ؟ عشان المخرج عايز كده ! هو قدر يخليك تحب البطل اكتر من الاطفال الي ماتت خلاك تتعاطف معاه علي كل عيوبه ؟! طيب مسآلتش نفسك هل يقدر المخرج انه يخليك تكره واحد حتى لو كله مميزات ؟ اه يقدر بالعكس ده اسهل ! طيب ،، عرفت ليه بقولك مش هيفرق 2000 واحد ماتوا ! حتى لو شوفتهم بعنيك بيصلوا ويصوموا وفيهم اطفال ونساء ! عرفت ليه مش هتتعاطف حتي لو شوفتهم بيتحرقوا او بيتخنقوا او يتعذبوا ! سيبك من العدد حتى ولو 100 الف واحد مات قدام عنيك بردو ولا هيفرقوا ! لآن للاسف المخرج مش عايز كده ! شوف مين الي بيخرج المشهد وشوف تاريخه ايه ؟ هل بيظلم ؟ بقولك ايه متعتبره فيلم كان اسمه تايتنك رابعة ! يمكن يصعبوا عليك ! المخرج لو عايز كده كان قالك ان من الي ماتوا كان فيهم مهندس ابوه بقاله سنين شغال شغلنتين عشان يجيبلوا مصاريف الكليه ! كان قالك ان من الي ماتوا كان فرحه الاسبوع الي جي ! كان قالك ان اهالي الشهداء فرحتهم بالدنيا لما يلاقوا ابنهم مقتول برصاصه بس وجسمه سليم لاهو محروق ولا متقطع ! كان قالك حاجات كتير اوي ! لكن هو قالك حاجه تانية ! عارف احنا اتعودنا انه يتقالنا ،، متعودناش اننا ندور بنفسنا ! احنا بقينا شعب درامي موسيقيى المشهد بس تاثر فيه ! بيتاثر بالي يمثل ويكره الي يقوله الحقيقه ،، عشان كده هنفضل طول عمرنا عايشين في فيلم كبير بينتهي حسب مزاج المخرج !.