لم يكن مجرد خلاف عادي بين الشحط محط والدهشوري كالذي يحدث كل يوم في المصلحة ولكنه تحول هذه المرة الى معركة دامية بين غريمين بينهما تار بايت! -عليا الطلاق بالتلاتة انت مجنون ولازم تروح الخانكة!! -انا برضه اللي مجنون يا مانخوليا ياللي معندكش نخوة ولا رجولة!!! وفجأة هجم الشحط على الدهشوري محاولا خنقه فأسرع الزملاء للفصل بينهما حتى لا يتطور الموقف لما هو أسوأ وظل الشحط يصرخ باعلى صوته: -ح تروح مني فين؟؟؟؟ وحياة ولادي لأدبحك! ومع احتدام الصياح والصراخ خرج زعبولة بيه من مكتبه لاستطلاع ما يجري فادركنا ان الموضوع ح يكبر... -تاني يا شحط بتضرب الدهشوري؟؟ ...الاسبوع اللى فات ضربت بقلظ والنهاردة الدهشوري.. طيب انت متحول للتحقيق!! -انا مش بس ح اضرب بقلظ والدهشوري..دا انا ح اضرب سعادتك كمان وبالجزمة القديمة !! -كده ياشحط انت كمان بتتهجم عليا؟؟؟ ....طيب مخصوم منك عشرين يوم!! -مخصوم مني انا ..وشرف أمي لأدبحك !! وكانت المفاجاة التي جمدت الدم في عروقنا حين سحب الشحط مطواة قرن غزال من جيب بنطلونه وغرزها في قلب زعبولة بيه الذي سقط متخبطا في دمائه وهو يصرخ بصوت متحشرج: -انتوا واقفين تتفرجوا عليا يا غجر!!!! اطلبوا لي الاسعاف بسرعة.. واطلبوا له البوليس! وهكذا وصلت الى المصلحة عربتا الاسعاف والشرطة في وقت واحد لكن زعبولة بيه كان قد لفظ انفاسه فاقتادونا الى قسم الشرطة لسماع اقوالنا.. -يعني مافيش حد فيكم سمع ولا شاف حاجة؟؟؟ -ابدا ياباشا ..احنا كنا بنشتغل في مكاتبنا ولاسمعنا ولاشفنا ايتها حاجة! -يعني ما تعرفوش ليه الشحط قتل زعبولة بيه بالمطواة ؟ -وغلاوتك ياباشا ما نعرف اي حاجة!!! انشا الله نطفحه!!! فتم استدعاء الشحط من التخشيبة لسؤاله فانكر التهمة تماما وقال: -والله العظيم ياباشا مالمسته ولا جيت ناحيته .. -يااد دي بصماتك ع المطواة..ودم زعبولة بيه مغرق هدومك ؟؟ -وغلاوتك ياباشا انا كنت بأحجِز بس !! والدهشورى هوه اللي قتل سعادته !!! فتم استدعاء الدهشوري لسؤاله فانكر التهمة مؤكدا ان الشحط هو الذي طعن زعبولة بيه... -طيب ايه اللى خللى الشحط يعمل كده ؟! -ده موضوع سعادتك الى يفيدك فيه زعبولة بيه ؟ -ياابني ما انت عارف ان زعبولة بيه اتكل على الله !!! -خلاص يبقى سعادتك تسأل الشحط محط!!!! ومع اصرار الجميع على الانكار اصدر المحقق قرارا بحبس الجميع لحين ظهور الحقيقة مما اثار جدلا واسعا في التخشيبة... -ماتتكلموا وتخلصونا!!! يعني معقولة نتحبس كده زي الفيران عشان زعبولة!!!! -ماحدش يفتح بقه...احنا كلنا عندنا عيال وعايزين نربيهم!!! انتو عارفين الشحط ممكن يعمل فينا ايه؟؟؟!!!ده بلطجي ووش اجرام وممكن يشرب من دمنا!!!!! ومع وصول التحقيقات الى طريق مسدود استدعت النيابة حرم زعبولة بيه بعد افاقتها من صدمتها ... -والله انا كل اللي عارفاه ان المرحوم كان بيعز الشحط وبيعتبره زي ولاده -طيب ليه الشحط قتله!!؟؟؟ -اهو ده السؤال اللي مش لاقية له اجابة!!! -طيب ايه اللى تعرفيه عن علاقة المرحوم ببقلظ والدهشوري ؟؟؟ -برضه الله يرحمه كان بيعتبرهم كلهم زي ولاده -واضح ان المرحوم الله يرحمه كان قلبه كبير قوي وحنين!! -وغلاوتك ياباشا ما شفت في حياتي أحن من زعبولة ..لولا بس حالة التوهان اللي جات له ليلة الحادث بعد ما الشحط كلمه في التليفون!!! فاستدعي المحقق الشحط لسؤاله عن فحوى المكالمة .. -ابدا المرحوم الله يرحمه كان مكلفني بشغلانة كده!!! ولما لقاني اتأخرت عليه فيها كلف الدهشوري!!! -يعني خناقتك مع الدهشوري كانت بسبب الشغلانة اللي كلفك بيها المرحوم ؟؟ -مظبوط كده !! وغلاوة سعادتك دي شغلانة كان ح يطلع لي منها مبلغ كويس لولا ان المرحوم استعجل !! -طيب ممكن توضح لي طبيعة الشغلانة اللي زعبولة بيه كلفك بيها!؟؟؟ -والله سعادتك ده موضوع ملعبك ومش مظبوط والافضل تسال فيه الدهشوري!! وبسؤال الدهشوري قال: -بصراحة كده زعبولة بيه كان عايز يتجوز !!! وكان مكلفني آخد رأي العروسة بس هي رفضت عشان سعادته متجوز وعنده بنتين!!!!! -يعني الجوازة دي هي سبب المصايب دي كلها!!! -مظبوط سعادتك !!! وكمان عشان العروسة كانت متجوزة وعلى ذمة راجل!!!! -يعني زعبولة بيه طلب ايد واحدة على ذمة راجل تاني؟؟!! -مظبوط سعادتك!!!! وكل الزملا عارفين كده خصوصا ان زعبولة بيه حاول يوسط ناس كتير في الموضوع ده ومنهم بقلظ!!! -طيب وايه علاقة الشحط بالموضوع ده ؟؟؟ -ماهي العروسة تبقى مراته !! -يا ادي المصيبة السودا!! يعني زعبولة بيه كان عايز يتجوز مرات الشحط والشحط كان عارف؟؟؟!! -طبعا ده حتى طلب خلو رجل جامد في الولية حرمه !!! بس زعبولة بيه كان عايزه يطلقها من غير ولا مليم!!!! -وانت ايه كان دورك في الحكاية الغريبة دي ؟؟!! -والله انا كنت باحاول اوفق بينهم بس الشحط زعل مني جامد لما شافني باحاول انزل المبلغ شوية !!!! -يعني ده سبب الخناقة بينكم يوم الحادث!! -مظبوط سعادتك!! وعلى فكرة دي ما كانتش اول خناقة!!! لأن الشحط اتخانق مع ناس كتير عشان نفس السبب!!!! وهكذا استدعي المحقق زوجة الشحط لسؤالها فقالت .. -وغلاوتك يا باشا ما اعرف حاجة عن الموضوع ده!! انا كل اللي اعرفه ان المرحوم زعبولة كان عايز يتجوزني وانا على ذمة الشحط!!! -ازاي الكلام ده يا ولية!!! -زي ما باقول لسعادتك كده!!! والشحط جوزي كان موافق بس طلب خلو رجل جامد من المرحوم زعبولة!!! -وانتي يا ست انتي تقبلي حاجة زي كده؟؟؟؟ انت ايه ما عندكيش دم ولا شرف ؟؟!! -هوه انا اقدر اتكلم يا باشا ولا افتح بقي!! ده الشحط محط يا باشا!! واضح ان سعادتك ما تعرفش الشحط !!! ده من يوم ما اتجوزني وهوه فاتح لي المطواة!!!!!! -للدرجة دي يا ولية ؟؟!! -وغلاوتك يا باشا ده حاططني في سجن وقافل عليا!! وطول النهار والليل ضرب واهانة وطجرمة وكل ما احاول افتح بقي يفتح لي المطواة ويقولي انه ح يروح فيا اللومان !! -واضح انه بلطجي ومجنون ووش اجرام!!!!!!!! طيب وايه علاقة الدهشوري بالموضوع ده!!! -في الاول الدهشوري اتدخل عشان يتمم موضوع الجوازة!!! وبعدين حاول يقنعني انه هوه اللي يتجوزني بدال الشحط وزعبولة بيه !!!! -يعني يا ولية؟؟؟؟؟ الدهشوري راخر كان عايز يتجوزك؟؟!!! -مظبوط جنابك!! بس انا قلتله عيب اختشي على دمك ده انت والشحط اصحاب!!!!! ولما الشحط عرف الحكاية دي راح اتخانق مع الدهشوري في الشغل !! وأخيرا قرر المحقق ان يواجه الشحط بكل الوقائع فقال .... -خلاص سعادتك بما ان الموضوع وصل لكده انا ح اعترف بكل حاجة!!! ايوه انا اللي قتلت زعبولة !!! ولو الله يجحمه مطرح ما راح رجع تاني الدنيا برضه ح ارجع اقتله!!! -طيب وليه كل ده يا شحط!!! -يا باشا أنا راجل دمي حامي وما اقبلش الحال المايل!! انا طلبت خلو رجل في الولية ... والله يرحمه كان عايزني أطلقها و يتجوزها بلوشي!!!!!!!!! يرضى مين الكلام ده يا اسيادنا؟؟!!!