اللعب فى المناخير والتلويح للجماهير

بعد مشاهدة جلسة محاكمة الرئيس السابق محمد حسنى مبارك بدقائق، دار هذا الحوار بين مواطنين صديقين من حزب الكنبة:
مواطن 1: شفت الراجل بدل ما يتكسف على دمه من اللى عملو فى الناس، جاى المحكمة «مششور» شعره وصابغه ولا اللى رايح النادي، وكل شوية يشاور للعالم ويعمل باى باى ولا كأنه حسين فهمى فى مهرجان السيما، ونسى أيام ما كان مستموت لنا، ونازل لعب فى مناخيرو!!
مواطن 2: طب والله ومالك عليا يمين وهو ورا الحديد برضو برنس كده وعنده كاريزما.. وبعدين حضرتك زعلان قوى عشان كان بيلعب فى مناخيرو مش أحسن من اللى فضحنا أُدام الأجانب، وتليفزيوناتهم، وفضل ساعة يلعب فى ال(…..) يا راجل بلاش غم.
مواطن 1: أنا مش زعلان ولا حاجه، خللى الناس تصحصح بعد ما شافته كده، وهو فى قمة «الانشراح» والشياكة، ويفتكروا كل اللى عمله فيهم، يمكن يكونوا نسيوا ولا حاجة.
مواطن 2: يا مفتري.. يا ظالم ده اللى عملوه فيكم الإخوان فى 8 شهور أضعاف اللى عمله فيكم الراجل السُكرة أبو ضحكة جنان ده فى 30 سنة، نسيت لما كنا بلد الأمن والأمان، وكنا ندخل سيما صيفى مع العيال والجماعة ونخرج الساعة 2 الفجر، نروح مشى لحد البيت، والعيال والبنات يسبقونا بييجى 100 متر، ولا خايفين من تحرش، ولا صايع بمطوة يطلع «يثبتنا» ويمد إيده على بناتنا وحريمنا؟
مواطن 1: إنت اللى مفتري.. نسيت الشهدا اللى راحوا فى 25 يناير، والمدرعات بتاعة حبيب العادلى اللى داست على شبابنا، والألف مصرى اللى راحوا فى العبارة وصاحبك سابهم للقروش تاكلهم وراح الاستاد يتفرج على ماتش كورة؟
نسيت ال400 صعيدى اللى اتحرقوا فى القطر اللى ما ينفعش يشيل بنى آدمين أصلاً؟
نسيت الفساد اللى كان بيحميه ويحرسه ولا كأنه «جيمي» ننوس عين أمه خايف عليه لا يبرد، مش كان واخد الفساد فى حضنه يرضعه ويكبره ويحميه؟
نسيت بيع القطاع العام بملاليم لأصحاب جيمى «الأمور» ورجالته، وتشريد العمال فى الشارع؟
.. نسيت تعليم ولادنا اللى باظ.. والمبيدات المسرطنة اللى خربت كلاوينا وأكبادنا وبقينا أول شعب فى العالم فى الإصابة بفيروس «سي»؟
نسيت «الغاز» المصرى اللى كان بيروح لإسرائيل برخص التراب وإحنا نشترى الأنبوبة بتلاتين زفت. نسيت أراضى مصر اللى اتوزعت على الألاطيش والمحاسيب، وولادنا مش لاقيين شقة فى المساكن الشعبية؟
نسيت المياه الملوثة وطوابير العيش وحرق الكنايس بتاعة إخوانا الأقباط وعيالنا اللى كل يوم تغرق بيهم مركب مودياهم أوروبا تهريب، وهما عارفين إنهم يا هيموتوا.. يا هيتسجنوا.. يا هيترحلوا.. نسيت؟
مواطن 2: بس.. بس كفاية ولا عشان ساكت ومبردش فتحت لنا ماسورة «نسيت».. نعم يا سيدى وإيه اللى اتغير من كل البلاوى اللى عمال تفكرنى بيها؟
لأ يا سيدي.. والله ما نسيت ولا هنسى كل ده وأكثر منه.. بس حضرتك قوللى إيه اللى اتغير بعد 8 شهور؟.. طوابير العيش.. المية الملوثة.. الفتنة الطائفية وحرق الكنايس.. عيالنا اللى بيغرقوا وهما هاربانين من البلد.. الشهدا اللى فى الثورة ولا اللى بعدها أكتر؟.. وحرايق القطارات زى ما هي.. وزاد على كل ده البلطجة والخطف والتثبيت. وضياع الهيبة أُدام دول العالم ومعاداة الأشقاء والأحباب.
أقولك والله إحنا نستاهل أحسن من دول ودوكهم بكتييييير.. واللى إحنا فيه حرام.. والله حرام..
وحفظ الله مصر وشعبها من كل سوء.
hossam@alwatan.com.kw
twitter@hossamfathy66