ساندوتشين هامبورجر....! عبد العزيز محمود

- خلاص شحنت "الانفار" يا شيخ الغفر ؟!!
هكذا سألني جناب العمدة في صبيحة يوم المواجهة بين مرشح الدائرة الاصيل ابن الاصول ومنافسه بتاع الكلام الكبير اللي مايجيبش همه فقلت على الفور:
- ماجنابك شايفهم أهم .. مترصصين في "التريللا" زي الأطباق البنور ومنورين !!!
- ومالهم كده مرعوبين ومتاخدين وحالتهم بالبلا!!!
- معلهش جنابك أصلهم متظبطين ع البيكو ...دا حتى فيه تلاتة منهم فرفروا واحنا بنظبطهم!!!ا
- ف ستين داهية....المهم انت عارف ح تعمل بيهم ايه انت والبهايم اللي معاك !؟؟؟
- يا عمدة ما تقلقش ...دا شغلنا ...بس جنابك قول يارب!!!!
قمت انا والزنكلوني وابوطاقية والترباس والخرتيت بعد الانفار مرة اخرى، واستلام بطاقات رقمهم القومي حتى لا يهرب احد ف الزحمة، وزيادة في الاحتياط ربطناهم جميعا بسلسلة حديد من بتاعت ولامؤاخذة المواشي، ثم أصدرت تعليماتي للسنتريسي السواق:
- اتوكل على الله يا سنتريسي
- يعني كله تمام؟!
- اتوكل علي الله وربنا يستر طريقك ....ويسترها معانا قادر ياكريم!!!!
سار السنتريسي بالتريللا وسط المزارع والغيطان حتى توقف امام مبني آيل للسقوط وهناك تم انزال الانفار ورصهم كالطوب في طابور حيث قلت لهم:
- لو طلعتوا رجالة يا غجر ح تاكلوا الشهد!
-ازاي يعني!؟
- ح ندي كل واحد فيكم ساندوتشين هامبورجر!!
أخذوا يصيحون ويهللون فواصلت حديثي: طبعا عارفين ح تهببوا ايه ؟؟؟
- وحياة غلاوتك عارفين ومتفطمين وجاهزين ومتودكين...واحنا محاسيب جنابو!!
- أنا مش عايز اغاني...اللي ح يسمع كلام جنابو... ربنا ح يكرمه آخر كرم ويرجع متعشي ..واللي ح يلعب بديله ح نقطعهوله!!!!
فصرخوا جميعا برعب :وحياة غلاوتك يا شيخ الغفر ما ح تلاقي ف الكفر اجدع مننا !!!!
-عموما ح نشوف .....وانتو فاكرين "حمودة القفل" النوبة اللى فاتت عملنا فيه ايه ؟؟!
أخذ الطابور يتحرك ببطء أمام اللجنة بسبب تدفق التريللات والجرارات والاتومبيلات والترومبيلات والموتوسيكلات والتريسكلات وعربات الكارو من كفرنا والكفور المجاورة، حتى تلقيت اول مكالمة من جنابو
-عايزك يا يلاااااا تصور لي بالموبايل ورقة كل نفر م الانفار بتوعنا!!
- ازاي يعني؟؟؟! ما جنابك عارف اننا مانقدرش نصور جوه اللجنة!
- خلاص يبقا كل نفر يصور ورقته بنفسه ..عشان نعرف ادا صوته لمين؟
- بس دول غلابة ومش كلهم معاهم موبايلات!!!
- مش شغلي ... الورق يتصور يعني يتصور!!!
- خلاص يا جنابو يتصور.. انشا الله نصوره بالكاميرا الخفية !!!!!
وهكذا وزعنا موبايلات سلف على كل من لا يحمل موبايلا، وتم ابلاغ الجميع ان ساندوتشين الهامبورجر ورضا جناب العمدة مرتبطان بصور الاوراق !!!
سألني احد الواقفين في الطابور باستغراب: صور ايه دي يا أخينا اللي جناب العمدة واجع قلبه عشانها؟؟؟
قلت : صور الاوراق اللي ح تنتخبوا فيها يا عم الحاج !
- طيب وجنابو ح يعرف ازاي ورقة علان من ترتان ؟!
- ما هو كل نفر ح يصور ورقته بمحموله جوه اللجنة !!!!
وهكذا سارت الامور آخر تمام بالصلا ع النبي لكن طلبات جنابو لم تتوقف:
-عايزك يالاااااااااتصورهم لي قدام اللجنة من وشهم ومن قفاهم!!!
-حاضر جنابك!!!
- وقبل ما يدخلوا اللجنة يمضوا على "سركي" ؟؟
-اوامر جنابك !!
-وعايزك كمان تاخد بصمات ايديهم ورجليهم والحمض النووي بتاعهم وهمه بيصوتوا!!!
-ماشي جنابك.. وياريت بعد اذنك... نعمل لهم تحاليل دم وبول وانفلونزا الخنازير!!!
- اوعا يالااا..حد يتحرك من مكانه قبل اعلان النتيجة!
- ليه بس كل دا ؟؟؟ ما العملية ماشية آخر حلاوة...واحنا ح نشوف الموبايلات زي ما جنابك امرت!
- كلامي واضح ...محدش يتحرك لغاية ما الحدوته تنتهي ....انا مش عايز مفاجآت!
- خلاص جنابك ح ننام قدام اللجنة لتاني يوم......ولا اقولك خليها لتالت يوم !!
وطبعا لم تحدث مفاجآت فالنتيجة كانت مضمونة ومحسومة بدعم ومساندة كل الجهات المعنية ..فوز ساحق لمرشح الدائرة على منافسه بتاع الكلام الكبير ..لكن المشكلة كانت في الزحام الشديد امام اللجنة بعد ان تجمع الانفار وهم يصيحون:
- مش خلاص بقا تدونا ساندوتشين الهامبورجر ؟!
- طبعا ياحلوين ....وح نديكم كمان كيسين بطاطس وإزازة بيبسي !!