انت ياله ...فرعوني ولا مش فرعوني؟! هكذا فاجأني المدير في المقابلة الخاصة بالوظيفة التي تقدمت اليها طمعا في كسرة خبز ناشفة اضافية للعيال ولأنني لم اكن اعرف توجهات الرجل حاولت أن أكسب بعض الوقت: مش فاهم سعادتك ...ممكن لو تكرمت تعيد السؤال لاني البعيد مخي تخين ! يا اااد بلاش استعباط..وجاوب ع السؤال : انت فرعوني ولا لااااأ؟!!! حلمك عليا ياباشا ..مش بس افهم الاول يعني ايه فرعوني؟ هوه انا لسه ح افهمك ! بعون الله ح افهم على ايدين سعادتك! يا بني فرعوني ..يعني من بتوع خوفو وخفرع ومنقرع..اي والله وخصوصا منقرع! ودول مين ياباشا؟! دول جدودك يا جاهل يا متخلف ! للاسف انا فعلا جاهل ف التاريخ .....لكن بما ان سعادتك شايف كده خلاص يبقى انا فرعوني ! ! طبعا فرعوني ..ولازم تفتخر باجدادك اللى علموا الدنيا الحضارة من سبع الاف سنة ! خلاص سعادتك افتخر ...بس ياريت تقول لي أجدادي دول عملوا ايه بالظبط ! دول يابني اللي بنوا الاهرامات والمعابد والجبابين والترب والمقابر اللي سابوها لنا ف كل حتة! اللهم صلى ع النبي ..وايه كمان؟! والتحف والاثار والكنوز اللي "الديابة" عمال تنهبها وتسرقها وتهربها وتبيعها للخواجات ! ياحلاوة ياولاد وايه كمان ؟ ودول اللى علموا الدنيا العلوم والفنون والتحنيط ..اي والله وخصوصا التحنيط! اشمعنا التحنيط سعادتك ؟ انت مش شايف الناس المتحنطة حواليك ف كل حتة! شايفهم طبعا ..هوه احنا لينا بركة الا همااا! والاهم من دا ودا يا بني ..انهم همه اللي علمونا اصول الفرعنة ..أظنك عارفها كويس! عارفها وحياتك..ما هي دي سبب وكستنا! بالعكس دي سبب قوتنا .. ولازم كلنا نحميها ونحافظ عليها! خلاص سعادتك ..ونحطها جوه عينينا! لازم ف كل حتة ودايرة وناحية يكون فيه فرعون الناس تخاف منه وتعمل له الف حساب مظبوط..واللى مالوش فرعون يشتري له فرعون يربيه ويطلع عينيه ويوريه النجوم ف عز الضهر عفارم عليك..ما انت فاهم كل حاجة اهو..امال تاعب قلبي معاك ليه؟! ياباشا..منك نستفيد الفرعنة دى مهمة ..عشان فيه ناس بتخاف ما تختشيش! تمام ...مظبوط! شايف يا محترم الكرباج السوداني اللى متعلق ع الحيط....دا كرباج الملك خوفو الله يرحمه! اللهم صلي ع النبي..دا زي مايكون جديد نوفي...ولسه طالع م "الاجنس"!! ابدا دا عمره سبع تلاف سنة..بس جدودنا وأبائنا عرفوا يحافظوا عليه ازاي ياباشا.؟ كانوا بينقعوه على طول ف الزيت..عشان كده ...زي ما انت شايفه ابن امبارح ...تحب تجرب؟! لا باشا..من غير تجربة انا عضمة كبيرة ومش ح استحمل....الله يرحمك ياجدو خوفو الله يرحمه طبعا..دا كان حكاية...الراجل دا يابني شغل 60 الف واحد يبنوا له "التربة" بتاعته تلاتين سنة..بالكرباج دا! وكانوا راضيين؟!!!! كانوا كل يوم بعد ماياكلوا طبق الفول بالبصل يبووسوا ايديهم وش وضهر...ويدعوا له! الله اكبر...اللهم صلي ع النبي..أهو كدا الفرعنة والا بلاش ! عشان كده يابني احنا فراعنة ...حنعيش فراعنة ونموت فراعنة طيب ياباشا سؤال صغير كده ع الماشي قول ...الظاهر انك غلباوي وح تتعبني معاك! بما ان أجدادنا الفراعنة همه اللى علموا الدنيا الحضارة ..أمال احنا ليه كدا ف الحضيض !!؟ عشان احنا يابني "مغنواتية"...بنغني وبس!!!!!