خناقة بين "دياب" و إسلام بحيري بعد سب الأخير لمعز مسعود

شن السيناريست محمد دياب هجومًا شرسًا على الباحث إسلام بحيري بعد توجيهه انتقادات تصل إلى حد السباب لزواج الداعية معز مسعود من الفنانة شيري عادل ، متهمًا الداعية الشهير ب"ركوب موجة" 30 يونيو.
وقال "دياب" في تدوينة عبر حسابه ب"فيس بوك" ردًا على تدوينة ل"بحيري" : "بما إني تم الحفيل عليا قبل كده فعارف إن الرد علي الكلام اللي بيتقال وقت الموجة عبث و رغم كده بما إني شاهد علي كلام معز عن خطوات الشيطان بما إني من مؤلفينه فكلامه صحيح و دقيق. "خطوات الشيطان" كان البرنامج الدرامي الوحيد اللي اتكلم عن إرهاصات الإرهاب سنة 2013 و 2014 و كلمه الدرامي تعني اللي كان علي شكل مسلسل، وصناعة المسلسل اللي نزل 20 يوليو 2013 خدت قبلها 7 شهور ما بين كتابة و إخراج و ده يعني إن الأفكار المطروحة مقررة من أكتر من 7 شهور مش زي مالاستاذ إسلام فاهم إنه مشي مع الموجه بعد 30/6".
وأضاف: "البرنامج عرض بعد 30/6 بأيام، و الدنيا كانت مولعة و فضلت مولعة سنين و رغم كده عملنا موسم تاني اكتر جرأه و طبعاً بسببه كان بيجي تهديدات و أنا شاهد علي إن معز ساب مصر بسبب التهديدات دي .. واضح طبعا إن الأستاذ إسلام غيران إن فيه حد تجرأ و دخل و لو من بعيد و قال إنه تضرر بسبب أحداث البلد غيره، و مسمي الكلمتين دول بتوع معز سطو علي بطولات الشعب المصري اللي هي بطولاته يعني، و علي فكره الأستاذ اسلام وقتها فعلاً كان شجاع و دي حاجه تحسبله، و لكن المفروض إنك باحث و بتحلل التراث و تيجي بوضوح تلوي دراع كلمتين واضحين و تحللهم علي هواك، ده يخليك يا متعمد تغالط يا مبتعرفش تحلل و تستخلص من الكلام الواضح مع إنها المفروض شغلتك .. مش عارف مين فيهم اوحش؟".
وتابع : "حقك تنتقد اللي عاوزه في آراء و تصرفات معز أو غيره بس من غير تدليس للحقائق و عامة اوعدك لما هتجيلك وقعة و تلاقي موجة التشييل عليك مش هتلاقي من واحد زي معز غير الإنصاف و حسن الظن لإنه انسان محترم و من أحسن الناس اللي عرفتهم في حياتي".