انفعل الإعلامي سيد علي - مقدم برنامج "حضرة المواطن" - بعد غضب الناس من خروج منتخب مصر من كأس العالم رغم عدم غضبهم من خروج مصر من التصنيف العالمي للتعليم . وقال "علي" في برنامجه المذاع على فضائية "الحدث اليوم" : "هو أنت كنت رايح المنتخب وعايز تكسب؟ .. دة أنت واخد مهاجم واحد ومعاك 8 مدافعين .. احنا رايحين نهزر .. والأخ مجدي عبد الغني دة واقف يضحك بعد دخول أهداف في منتخب مصر .. دة معندوش حياء .. شايف مارادونا بيبكي بعد خسارة الأرجنتين من كرواتيا ودة بيضحك ". وأضاف: "احنا وصلنا كأس العالم بالصدفة .. بضربة جزاء جابها تريزيجيه في آخر دقيقة .. وأوغندا المنافس بتاعك خسر 3 مباريات على أرضه .. هو فيه منافس يخسر كل دة؟ احنا حانهزر؟" . وتابع : "عملتلي من صلاح بطل قومي وهو يستحق .. ونسيت العشرة الباقيين؟ دة فريق جماعي .. والأخ سعد سمير اللي كانوا كل شوية يجيبولنا الإعلان بتاعه ملعب أصلا في المونديال ". واستدرك : "الناس أخدت موقف من الشركة الحكومية اللي طلعت الفنانين على حسابها يشجعوا المنتخب .. أمال فين أبناء الشهداء والطلبة المتفوقين .. أو كنت اعمل قرعة بين المشتركين بتوعك وطلعهم .. اللي أنت عملته جاب نتيجة عكسية .. دة بدل ما تظبط الاتصالات أو تظبط النت اللي هو دورك؟ .. احنا رايحين نهزر واللي حصل في المنتخب انعكاس لحاجات كتير". الفيديو: