مأساة.. بطل مصر يرقد بالمستشفى على«الحديدة»

تحت شعار «انقذوا بطل مصر»، تداول نشطاء على مواقع التواصل الاجتماعي «فيس بوك» و«تويتر»، قصة بطل مصر في كمال الأجسام محمد سعد محمد 38 سنة، والذي يرقد في مستشفى الجلاء العسكري في حالة خطرة، بعد أن رفضت عدة مستشفيات استقباله، كما أنه مهدد بالطرد من مستشفى الجلاء نظرًا لحالته المادية المتردية حتى أصبح هو وأسرته التي يعولها بجانب والده ووالدته على «الحديدة».
وروى النشطاء مأساة بطل مصر، مرفقة بصورة له من إحدى البطولات التي شارك فيها، قائلين :« اللي قدامكم ده في غيبوبة تامة وعنده نزيف بالمخ ..اللي قدامكم ده علي سرير عناية مركزة بمستشفي الجلاء العسكري ..وأهله مش معاهم جنيه.. ده/ محمد سعد محمد 38 سنة ..بطل مصر في كمال الأجسام .. تاني عالم في اسبانيا 2015 .. بطل مصر عام 2009،2010.. بطل البحر المتوسط عام 2011 .. محمد رفع اسم و علم بلده كتير» .
وتابع النشطاء في المنشور المتداول بينهم:« محمد عشان يصرف علي نفسه ويعرف يبني جسمه وقتها باع شقته وباع دهب مراته ..وكانت المكافأة من ربنا بالمركز التاني ..محمد رجع وعايش دلوقتي او كان عايش لحد الفجر هو وزوجته وولاده الستة في شقة مع أمه ..محمد اخته توفت من سنة وجوزها راح له وقال له دول ولاد اختك ربيهم».
وتابعوا :« محمد سعد في رقبته كوم لحم ..أمه زوجته والده الخمسة وبنات اخته الاتنين ..كلهم مسؤولين منه كل اللي فوق ده مش مهم بالنسبة للي جاي فجر النهاردة محمد تعب جداً وأغمى عليه جريوا بيه علي مستشفي الْيَوْمَ الواحد ..رفضوا يقبلوه ..راحوا علي مستشفي المطرية العام رفضوا يقبلوه ...راحوا بيه علي مستشفي كليوباترا ..قالوا لهم مفيش مكان ..راحوا علي القاهرة التخصصي قالوا لهم مفيش مكان عندنا».
وأضافوا :« المهم راحوا مستشفي العلاج العسكري ..قبلوه ..وطلع عنده نزيف بالمخ ودخل في غيبوبة بسبب اللف بين المستشفيات ..المهم دخوله مستشفي الجلاء كان لازم يدفع له التأمين ..الاسرة مش معاها اي فلوس ..المهم ان مجموعة من أصحابه الحقيقيين لموا مع بعض و دفعوا فلوس التأمين .. دلوقتي مر 12 ساعة ومحمد لسه في غيبوبة ..محمد الاتحاد بتاعه ميعرفش عنه حاجة ..ولو الاتحاد عرف بقصة محمد اصلا ..الاتحاد مش معاه يصرف علي نفسه .. المهم ان أسرة محمد و كوم اللحم اللي ورآه لازم يدفع 15الف جنيه كل 3 ايّام ..وهم مش معاهم حق التاكسي ال ينقلهم من المطرية لمستشفي الجلاء ..واصحاب محمد مشكورين. مش معاهم يدفعوا تاني .
وناشد النشطاء وزير الشباب والرياضة بالتدخل لإنقاذ بطل مصر:« لو حد يعرف المهندس خالد عبد العزيز وزير الشباب والرياضة ..او حد من المحررين العسكريين يتواصلوا. مع مسئولي المستشفي. او القيادة العامة..محمد بطل مصري وقبلها مواطن مصري .. أنقذوه وانقذوا أسرته وارحموا دموع أمه واطفاله الستة».
من جانبه أكد الكاتب الصحفي سامي عبدالراضي والذي كان سببًا في تفجير قضية بطل مصر، أن وزير الدفاع وافق على استكماله العلاج بالمستشفى وتحمل النفقات.
وكتب على صفحته :« شكراً لكل الزملاء والاصدقاء اللي تفاعلوا مع قصة البطل محمد سعد .. شكرا للواء المحترم محسن عبد النبي مدير الشئون المعنوية بالقوات المسلحة الذي اهتم بقصة البطل..وايضا وزير الشباب والرياضة الذي اتصل بالفريق اول صدقي صبحي ووحد الطريق ممهداً ووافق السيد وزير الدفاع علي استكمال علاج البطل بمستشفي الجلاء وتحمل النفقات ..شكرا لكل البرامج في التلفزيون والإذاعة التي تفاعلت جميعاً باستثناءات قليلة .. محمد ينقصه الشيء الأهم الان وهو دعوات مخلصة بان يعود الي وعيه ويسترد عافيته من اجل ابنائه الستة».