نشوى الحوفى: هذه أسباب زيادة تذكرة المترو

أيدت نشوى الحوفي، عضو لجنة العفو الرئاسي، قرار الدكتور هشام عرفات وزير النقل، برفع أسعار تذكرة مترو الأنفاق، مبررة ذلك بالخسارة التي يعاني منها مترو الإنفاق.
وكتبت عبر صفحتها الشخصية بموقع التواصل الاجتماعي فيس بوك قائلة: "تذكرة المترو، صورة كاملة، هل تذكرة المترو بتتباع بسعرها؟ لا طبعًا دي مش أقل من سعرها وبس دي أقل من سعر أي وسيلة مواصلات تانية في القطاع الخاص وأعني بيها الميكروباص والتوك توك، ويبقى المترو أسرع وآمن وأكثر حضارة".
وطرحت الحوفي سؤالاً لتبرز من خلاله أسباب هذا القرار «هل يخسر قطاع إدارة المترو؟، أيوه فعلاً بيخسر، بيخسر لأن الخدمة مش بتمنها الحقيقي فخسارته السنوية 200 مليون جنيه، ومديون لوزارة الكهربا بمبلغ 250 مليون جنيه، بيخسر لأن المكن بايظ وبيعدي ناس ما معهاش وما فيش رقابة في كل المحطات بنفس المستوى، بيخسر لأن ما فيش رؤية لاستغلال محطاته إعلانيًا وتجاريًا بشكل يدر أرباحًا على الهيئة وبالتالي الدولة اللي رفعت مرتبات الموظفين فيه 400 % رغم كل الظروف اللي بنمر بيها».
وأضافت «هل الزيادة عادلة؟ ..لأ لسه مش عادلة لأن في دول كتير زرتها سعر التذكرة مرهون بعدد المحطات مش تذكرة بسعر موحد، هل كل الناس اللي بتشتكي عندها حق؟ لا طبعًا مش كلهم لكن ده مينفيش إن فيه فئة تعبانة جدًا زادت عليها أعباء الحياة مرة واحدة مع كل الإجراءات الإصلاحية للاقتصاد».
واختتمت الحوفي، تدوينتها قائلة: «الخلاصة.. كان لازم تزيد سعر تذكرة المترو لكن كان لازم يحصل معاها عملية إعادة ترتيب أوراق المترو للحصول على موارد إضافية تزيد من تحسين الخدمة والقدرة على ضخ سيولة لخزنة الدولة، الجميع مسئول وكلنا محتاجين نكمل بعض ونتحمل بعض عشان مصر تعدي».