أشرف توفيق يكتب: حوار مع مسؤول مترو الأنفاق

- صباح الخير يا فندم، أنا جاى أشتكى من المترو.
- أهلا وسهلا، ده احنا فى خدمة المواطنين.. اتفضل.
- دلوقتى حضرتك القطارات بقت بتتأخر قوى والناس زحمة.
- بس إيه رأيك فى تغيير يفط المحطات الجديدة، مش حلوة؟.
- يفط إيه؟ أنا باتكلم عن القطارات.
- وإيه فايدة سرعة القطارات والناس مش عارفة هيه واقفة ف محطة إيه يا حضرة؟
- يعنى هوه تلميع اليفط وتغيير خط اليفط هوه اللى هيفرق؟
- لو مش عاجبك احنا تحت أمر المواطن.. تحب الخط يبقى رقعة؟ ديوانى؟ فارسى؟
- يا فندم سيبك من اليفط خالص.. طب المكن كله بايظ.
- يعنى حضرتك تمسك فى موضوع المكن البايظ وتسيب السلالم الكهربا اللى بقت فى كل المحطات؟
- يا فندم إيه فايدة سلالم الكهربا والناس بتموت من الزحمة عشان المكن.. أقول لك: سيبك من المكن.. طب عربية السيدات، الرجالة لسة بتركب فيها وكل يوم خناقات.
- أهو انتو كده يا شباب اليوم.. مافيش صبر.. يا سيدى الفاضل دى خطة خمسية معروفة.. يعنى أول خمس سنين نبتدى نعمل يفطة إن دى عربية السيدات، تانى خمس سنين تبدأ الرجالة تعرف.
- طب وبعد عشر سنين، هتمنعوا الرجالة بقى؟
- لأ طبعا.. هتبقى الستات اتعودت أن الرجالة بيركبوا معاهم.. هاهاهاها.
- يادى النيلة.. طب حضرتك مافيش أمن فى المحطات، لو خناقة حصلت مافيش أمن بيتدخل، والناس اللى بتفضها.
- ما هى دى روح التعاون اللى عند الشعب المصرى، خلى الشعب يخلص على بعضه.. أقصد يساعد بعضه.
- يافندم دى حاجة ماترضيش ربنا.
- ربنا؟ آه أنا كده فهمت حضرتك.. من بكرة هنغير كل يفط المحطات للخط الكوفى الفاطمى.
- اشمعنى يا فندم؟
- علشان مصر إسلامية يا بنى!