أبو عرايس: الإعلام شوه الإخوان في عيني وحابب أرفع الظلم عنهم

دافع سامح أبو عرايس - مؤسس حملة أبناء مبارك - عن جماعة الإخوان ، مؤكدًا أنه يعتقد أنهم ظُلموا حسب رأيه.
وقال "أبو عرايس" في تدوينة عبر حسابه ب"فيس بوك": "شهادة حق .. كنت لفترة طويلة أكره جماعة الاخوان وكانت فكرتي عنهم أنهم جماعة متطرفة إرهابية وكل الكلام اللي بيردده علينا الإعلام ليل نهار .. لكن مع الوقت اكتشفت أن الكلام ده غلط .. وأني كنت متأثر بالإعلام والسينما والكتابات السياسية اللي شوهتهم لأهداف سياسية .. واللي اكتشفته أن الناس دي ناس كويسة جدا .. عندها مشروع نهضة حقيقي لمصر وللمنطقة كلها .. مشروع تحت غطاء إسلامي ممكن يوحد المنطقة العربية والاسلامية ويحولها لقوة كبرى كما كانت في الماضي .. ويمكن ده السبب الحقيقي اللي بتحارب من أجله الجماعة .. لأن القوى الكبرى في العالم مش عايزة المنطقة تتوحد .. وعايزيننا نقدس الحدود اللي وضعها الاستعمار" حسب قوله.
وأضاف: "جماعة الإخوان ممكن تكون أخطأت في أشياء نعم .. ممكن يكون أفرادها غلطوا .. لكن كان دائما يوجد من يركز على أخطائهم ويضخمها .. مع إننا لو فكرنا شوية ممكن نلاقيها رد فعل على الظلم الكبير اللي تعرضوا له لسنين طويلة .. وعموما الكل أخطأ مش الإخوان أو التيار الاسلامي بس .. الخلاصة اللي اكتشفتها في النهاية أن جماعة الإخوان جماعة محترمة وصاحبة مشروع وحدوي ممكن يعمل نهضة للمنطقة كلها .. صحيح لهم أخطاء زي غيرهم لكن المعدن سليم والنية سليمة .. ولو كان عندنا ناس بتفهم في مصر كانت ممكن جماعة الإخوان بشوية إدارة سليمة تبقى مصدر خير كبير لمصر والمنطقة العربية والإسلامية كلها وتحول مصر والمنطقة الى قوة كبرى اقتصاديا وسياسيا .. أنا قررت أقول الكلام ده مش لأي شئ إلا لرغبة في رفع الظلم والتشويه عن ناس شايفهم ظلموا كثيرا .. ويمكن يكون كلامي سبب في أن بعض الناس تراجع أفكارها وتبحث بنفسها يمكن تكتشف الحقيقة " حسب رأيه.