مدير "حملة عمر سليمان": لهذه الأسباب تحارب القوى العظمي جماعة الإخوان

اعترف سامح أبوعرايس، مدير حملة عمر سليمان وأحد رموز حملة أبناء مبارك، بخطأ فكرته عن جماعة الإخوان المسلمين على مدار سنوات طويلة، مؤكدا أن الجماعة تمتلك مشروعا حقيقيا لنهضة مصر والمنطقة كلها.
وكتب أبوعرايس– عبر صفحته على فيسبوك- "شهادة حق.. كنت لفترة طويلة أكره جماعة الإخوان، وكانت فكرتي عنهم أنهم جماعة متطرفة إرهابية، وكل الكلام اللي بيردده الإعلام ليل نهار.. لكن مع الوقت اكتشفت أن الكلام ده غلط.. وأني كنت متأثرا بالإعلام والسينما والكتابات السياسية اللي شوهتهم لأهداف سياسية.. واللي اكتشفته إن الناس دي ناس كويسة جدا.. عندها مشروع نهضة حقيقي لمصر وللمنطقة كلها.. مشروع تحت غطاء إسلامي ممكن يوحد المنطقة العربية والإسلامية، ويحولها لقوة كبرى كما كانت في الماضي.. ويمكن ده السبب الحقيقي اللي بتُحارب من أجله الجماعة؛ لأن القوى الكبرى في العالم مش عايزه المنطقة تتوحد.. وعايزينا نقدس الحدود اللي وضعها الاستعمار".
وأضاف أبوعرايس: "جماعة الإخوان ممكن تكون أخطأت في أشياء نعم.. ممكن يكون أفرادها غلطوا.. لكن كان دائما يوجد من يركز على أخطائهم ويضخمها.. مع أننا لو فكرنا شوية ممكن نلاقيها رد فعل على الظلم الكبير اللي تعرضوا له لسنين طويلة.. وعموما الكل أخطأ مش الإخوان أو التيار الإسلامي بس".
وتابع أبوعرايس، قائلا: "الخلاصة اللي اكتشفتها في النهاية إن جماعة الإخوان جماعة محترمة وصاحبة مشروع وحدوي ممكن يعمل نهضة للمنطقة كلها.. صحيح لهم أخطاء زي غيرهم، لكنّ المعدن سليم والنية سليمة.. ولو كان عندنا ناس بتفهم في مصر كانت ممكن جماعة الإخوان بشوية إدارة سليمة تبقى مصدر خير كبير لمصر والمنطقة العربية والإسلامية كلها، وتحول مصر والمنطقة إلى قوة كبرى اقتصاديا وسياسيا".
واختتم أبوعرايس، قائلا : "أنا قررت أقول الكلام ده مش لأي شيء إلا رغبة في رفع الظلم والتشويه عن ناس شايفهم ظلموا كثيرا.. ويمكن يكون كلامي سبب في إن بعض الناس تراجع أفكارها وتبحث بنفسها يمكن تكتشف الحقيقة!".