لو داعش عمل حزب كان أحسن من البرلمان الحالي

أبو عرب:

تهكم الكاتب الصحفي تامر أبو عرب على الأداء البرلماني لمجلس النواب الحالي ، مؤكدًا أن تنظيم "داعش" لو حصل على الأغلبية في مصر لكان أفضل من المجلس الحالي.
وقال في تدوينة عبر حسابه ب"فيس بوك": "بصراحة أنا معجب جدا بالنائب أبو المعاطي مصطفى .. راجل برنس في نفسه كدة
.. كان فيه شوية نواب كدة عاوزين يغيروا شوية مواد في قانون العقوبات عشان يمنعوا الحبس في قضايا النشر الخاصة بخدش الحياء العام، وده طبعا معجبش النواب الغيورين على الأخلاق والآداب العامة فرفضوا طبعا الكلام الفارغ ده وقالوا احنا بلد شرقي واللي يخدش الحياء العام يتحبس على طول".
وأضاف: "النواب اللي مقدمين اقتراح التعديل قالوا طيب ما هو لو هنتعامل بالمنطق ده يبقى روايات نجيب محفوظ خادشة للحياء
طبعا هم فاكرين إنهم كدة بيحرجوا النواب اللي رافضين التعديل واللي مؤيدين الحبس، لكن على مين؟ النائب أبو المعاطي قام عامل دخول مفاجئ وقال لهم (آه بقى. رواياته خادشة للحياء وكان المفروض يتحبس بس محدش وقتها حرك دعاوى جنائية ضده) وكان ناقص بس يقول "نفد ابن اللذينة"
واستدرك : "هي دي الروح اللي احنا عاوزينها، زهقنا بقي من الإيد المرتعشة وعاوزين ناس كتير زي الأستاذ أبو المعاطي اللي شعارهم (آه هو كدة بقى)" .. مضيفًا: " بس ياسيدي واترفضت التعديلات بأغلبية ساحقة في اللجنة التشريعية، 21 رفضوها وأيدوا الحبس مقابل 6 بس كانوا ضد حبس المبدعين ، فأنا قلت أقول لكم بقى عشان تحمدوا ربنا إننا خلصنا من الجماعات الظلامية اللي كانت عاوزة تغير هوية الشعب المصري وتفرض ثقافتها البدوية".
ونوه في نهاية تدوينته قائلًا: " لو داعش عمل حزب وخد الأغلبية في البرلمان كانت ممكن النتيجة تطلع أحسن من كدة" حسب رأيه.