بعث حمدي قشطة، المتحدث الرسمي باسم حركة شباب 6 أبريل "الجبهة الديمقراطية"، برسالة من داخل محبسه بسجن الكيلو 10 ونصف؛ على خلفية قضية التظاهر لرفض اتفاقية ترسيم الحدود بين مصر والمملكة العربية السعودية، لتهنئة شباب الثورة بعيد الفطر، وشكرهم على تهنئته بقدوم مولدته "حرية". وقال حمدي في رسالته التي بدأها بالضحكة وبفرحة العيد: "أولا الله يبارك فيكم وعقبالكم كلكم وأحب أبلغ الباشا أنى عندى حرية أه واللي عندي حرية رغم سجنك وقهرك لكن عندي حرية، رغم الإحساس اللي مفيش أعب ولا أقسى منه بأن ابنك أو بنتك تتولد ومتقدرش تشوفها وتشيلها، ورغم كمية القهر اللى حسيتها، وأنى للحظات حسيت بالضعف وأنى طيب أعمل أيه؟ وإحساس بقلة الحيلة إلا إنه رغم علمي بوصول حرية بسلامة وأنا فعلا حسيت بالحرية رغم السجن ، يا باشا أنا عندي حرية وهعلمها أن صوتها ثورة مش عورة". وأضاف: :حفظها شكل عمها سيد وزة وهبلغها هو مات ليه وإزاى، هبلغها إزاى تتعلم من سناء سيف الثورة والحق، هحكيلها عن عماتها وأعمامها اللى في المعتقلات واللى بره واقفين جمب المعتقلين والمعتقلات، يا باشا ويا بيه والله المستقبل بتاعنا وكله حرية أنا عندي حرية وانت معندكش غير سجن". وتابع حمدى في رسالته "ثانيا: كل سنة وانتوا طيبين وعيد سعيد ولازم تعرفوا وبلغوا كل أهالينا إننا بنحس فرحة العيد لما انتم بره بتعيدوا وإحنا جو هنعيد وهننفخ بلالين كتير في السجن وهنغني العيد فرحة وهنعمل برامج منوعات جوه كفاية إن احنا نعمل إعلام صادق وأكيد برده هنعمل إعلان برضه لأم حسين وهى بتدى حلقها لنبطشي العنبر علشان يجيب لنا الكحك العيد". طالب حمدى في رسالته بتغيير هاشتاج عيدهم في السجن قائلا: "لأن عيدنا فعلا مش هيكون مسجون، إحنا اللى هنأثر فيهم ومش هنسيبهم يأثروا على فرحتنا، قولولهم #سجونكم _ هتعيد هنعلق مكان الشبابيك الحديد بلالين ورسومات فرحة وعيد ولعب على الباب الحديد". واختتم: "كل سنة وأنتوا طيبين.. أنا عندي حرية.. سجونكم هتعيد.. وبالضحكة نختم وبفرحة العيد وضحكة حرية".