السيسي: «حققنا حاجات مش هنقدر نقول عليها»

بالفيديو..

هنأ الرئيس عبد الفتاح السيسي، جموع الشعب المصري، بمناسبة حلول شهر رمضان المعظم، وذلك خلال حفل إفطار الأسرة المصرية، الذي دعت له الرئاسة المصرية، اليوم السبت.
وإلى نص كلمة الرئيس خلال الحفل:-
«برحب بكم جميعًا، بقولكوا كل سنة وإنتوا طيبين، بهني الشعب المصري بمناسبة الشهر الكريم، وبنتمنى نكرر اليوم ده خلال هذا الشهر، لأنه تقليد إحنا بنحفاظ عليه، في إطار قيم وعادات مصرية محتاجين دايمًا نحافظ عليها، لأنها هويتنا وعاداتنا وتقاليدنا النبيلة، اليوم كان محاولة لتأكيد حرصنا على هذه العادات والتقاليد، التي نحاول تعزيزيها، في مواجهة محاولات لتغيير هذه الهوية، لكن مش هيقدروا إن شاء الله».
«كده انتهت سنتين من مدة رئاستي، حاولنا نقدم ما تم إنجازه خلال الفترة الماضية، وعرضنا فيلم عن هذه الإنجازات، وهذه إنجازات المصريين مش حد تاني، واللي تحقق كتير، كتير جدًا في عمر السنتين، في حاجات تم عرضها وفي حاجات لسه، وفي حاجات مش هتتقال خالص.. ما قدمناه إنجاز جيد، لكننا نحتاج عمل أكتر وإخلاص أكتر وصبر أكتر، وأكيد ربنا هيوفقنا في اللي بنتمنى نعمله لبلدنا».
«حالة الاستقرار والأمن اللي تحققت خلال السنتين لازم نلتفت إليها، بنتقدم كل يوم في هذا الملف، وحالة الاستقرار والأمن مش تصدي للإرهاب وبس، لكن من خلال تماسك الدولة ومؤسساتها اللي بتعود كل يوم عن اللي قبله، حالة الانضباط والتماسك نتحصل عليها يوم بعد يوم، هذه الحالة تزيد، وده عشان نقدر نكمل اللي بنتمناه».
«قررنا خلال الأيام اللي فاتت زيادة نسبة المعاشات، الحد الأدني مش كفاية، لكن إحنا منقدرش نزوده أكتر من كده، لو كنا نقدر نزود أكتر كنا زودنا، محدش بيجيب حاجة من جيبه، ده من جيب مصر، لكن جيب مصر مش.... وبقول لكل إنسان بيعاني إحنا حاسين بيك وشايفينك وبنحاول نقدملك أكتر، والله كنا بنتمنى نقدم أكتر».
«أوعوا تتصوروا إن اللي حصل خلال ال5 سنين اللي فاتوا تأثيراته مش كبيرة على بلدنا، لازم كلنا ناخد بالنا من ده، وإحنا ماشيين كويس، لكن مفيش تقدم بيتم للأمم غير بالعمل والصبر والإخلاص والأمانة والشرف».
«أخر ملحوظة هي الأسعار، كل رمضان بنغلي على بعضنا، رغم إنه كان الأولى إننا نقللها مش نزودها، خاصةً إن نسبة استهلاكنا زيادة في الشهر ده من 15- 20% عن الشهور التانية».
«بقول للحكومة، من فضلكم إحنا محتاجين مزيد من ضبط الأسعار أكتر من كده عشان الناس البسطاء، وبقول لكل من يتحكم في الأسعار والسلع وحاجات الناس، أرجو أن تترفق وتحنو على أهلك المصريين».
«عايز أطمنكم.. إحنا بخير أوي، والحمد لله، سيناء وكل حتة في مصر، واللي بيتعمل كتير، بس مش كتير على سيناء ولا أهلها، ولسه أكتر إن شاء الله.. سعيد بلقائكم، وكل سنة وإنتوا طيبيين».
شاهد الفيديو :