صلاح جاهينّا

مسحراتى مصر البهية
اصحى وسبح رب البرية
مشيت أرتل وانشد وأجود
وصوتى يجرى بين النواصى
هنا بانقر.. هنا باعود
هنا باحود عن المعاصى
لو كنت بحرى.. لازم أقبل
وإن كنت قبلى.. لازم أبحر
ولحد آخر نفس ف صدرى
هاشد قلبى وتر واسحر
يا مصر قومى وشوفى نيلك
يا مصر قومى وضمى سينا
نهر المحبة بينتمى لك
يا مصر شوفى احنا فين رسينا
مصر البهية.. بالعقل هيه
ف الذكر آية.. ف العشق غية
اصحى وسبح رب البرية..
■ ■ ■
مسحراتى يا طيبين
مسحراتى ما اعرفش مين
يوزن ف قلبى صلاح جاهين
ما اعرفش زيه
حكمة وبساطة
ما اعرفش زيه
طفل وعجوز
جاب كل حاجة على بلاطة
وما يجوز أو لا يجوز
شال اكتئابه.. داخل جنابه
وزع شبابه ع اللى يعوز
طفل المشاعر وياما ربى
ولا مرة خبى عشق البنات
هو المربرب من المربى
وهو ألطف الكائنات
يقول يا أهلا لو المعارك
هيه اللى طلبت التضحيات
لازم بنارها هانستبارك
ونغنى حى على الثبات
عجبى يا دنيا.. على نن عينا
تبنى الحواجز بينا وبينا
وتحرمينا وتاخدى منا
أجمل ما فينا.. صلاح جاهينا
■ ■ ■
الثورة قامت غنى لها «صورة»
وسلاحنا غنى والله زمان
إدانا حكمة وقت الضرورة
وادانا ضحكة فيها الأمان
الحلم طالع من أرض صابرة
تتمنى مرة نظرة حنان
وهو عايز تمثال وأوبرا
على ترعة سارحة بين الغيطان
عجبى يا دنيا.. على نن عينا
تبنى الحواجز بينا وبينا
وتحرمينا وتاخدى منا
أجمل ما فينا.. صلاح جاهينا
■ ■ ■
أبويا وابنى.. خالى وخلى
ليلته الكبيرة.. إبداع محلى
والإنسانية ف أربع سطور
وياه بتوصل إلى التجلى
عايز تصاحب روحه وطيشها
على اسم مصر ابنى وعلى
عايز تعيش ابتسامته عيشها
وخلى بالك من زوز.. خلى
عجبى يا دنيا.. على نن عينا
تبنى الحواجز بينا وبينا
وتحرمينا وتاخدى منا
أجمل ما فينا.. صلاح جاهينا
■ ■ ■
مسحراتى ف الذكر هايم
والنسمة حلوة ولا حد نايم
والكل صابح معانا صايم
ف الفجر يدعى ويقول يا رب
رمضان يا أكرم م الشمس ذاتها
أرواحنا عندك تبدأ حياتها
والنفس راضية تلحق ما فاتها
تطلب هداية وتقول يا رب
المصرى بنا وفلاح وجندى
وعندى جامع.. وكنيسة عندى
الرحمة من دا.. والحب من دى
ومن قلوبنا بنقول يا رب