«أنا مش وزن سياسي».. عمرو أديب يكشف تفاصيل محاولة اغتياله وخلافه مع مبارك

كشف عمرو أديب عن خلافه السابق مع الرئيس الراحل محمد حسني مبارك، وإيقافه عن العمل الإعلامي والخروج على الهواء، وحقيقة وجود محاولة لاغتياله.
وقال «أديب» في تصريحات لبرنامج «قابل للجدل»، عبر قناة «العربية»: «السؤال ده مهم جدا عشان عايز أجيب على شيء بيتردد بشكل يخنق، اللي هو فكرة إيه؟ يقول لك أنت في 2006 كان ليك رأي وبعدين في 2014 ليك رأي تاني، يا جماعة أنا لا أحمل رسالة دينية، أنا ممكن أغير رأيي، أنا عايز أفهم ما هي المشكلة إن أنا كنت أرى شيء في وقت ثم أرى الآن شيء آخر، العالم كله كده، يغير الناس من آرائهم».
وأضاف: «يقول لك شفت آدي كلامه سنة 2009 وآدي كلامه في 2014، آه غيرت رأيي، شفت شيء آخر جالي برهان، قررت أن أنا كنت غلط وبقيت صح، ما هي المشكلة؟!».
وتابع: «بالنسبة للرئيس محمد حسني مبارك، هذا رجل الله يرحمه، أنا أكتر صحفي ركبت معاه الطيارة، أسافر معه في جولات، راجل عظيم وراجل محترم ومعنديش ضده أي شيء».
وأوضح: «لكن في نهاية عصر مبارك الدولة كان فيها عدد من المراكز عدد من القوى عدد من التنازع في ما يسمى بالحرس القديم والحرس الجديد، كان فيه شائعات التوريث أكرر شائعات التوريث، هل كان التوريث حقيقي أو غير حقيقي؟ هذا الأمر لم يكن واضحا بالنسبة لنا».
وأكمل: «إنما في هذا الوقت، الواحد برضه خدته… وعلى فكرة التأثير اللي أنا كنت بعمله ده كنت بعمله في قناه مشفرة، يعني كان يراها مشتركين يدفعون مبالغ كبيرة، وهنا حصل الصدام. أنا لا أعلم حتى الآن من في إدارة الرئيس مبارك مضى الورقة بتاعة إيقافي وإن أنا أقعد في البيت».
واستطرد أديب: «الفكرة اللي أنا قلتها يومها والناس كلها تضايقت لما قلت الجملة الشهيرة (خدوني معاكم) أنا يومها قلت لهم أنتم عارفين إن هذا الرجل قادم ليكون رئيس (جمال مبارك) طب ما تقولولي خدوني معاكم ده، كانت المشكلة وكانت هي دي الجملة الأخيرة».
وتابع: «تم منعي من العمل في القناه اللي أنا فيها أو في أي قناة في العالم العربي، ويجب أن أذكر بالعرفان الشيخ وليد الإبراهيم (مؤسس ورئيس مجلس إدارة مجموعة MBC)، إذ توسط للموافقة على عمله في برنامج (آراب جوت تالنت)».
محاولة اغتيال عمرو أديب
عن محاولة اغتياله، قال أديب: «عندما قامت ثورة 2011 ظهر أحد الأشخاص وقال أنا اللي رميت ميه نار على عربية عمرو أديب».
وأضاف: «الفيديو موجود، مية النار دي اترمت الساعة 2 الظهر في أكثر ميادين الجيزة ازدحامًا. أنا سمعت صوت الصلب وهو بيطقطق. ومع ذلك أنا لا أساوي شيء سياسي، أنا مش وزن سياسي يا جماعة».