«كانت مصدومة من الموضوع».. تفاصيل مواجهة والد ضحايا جريمة الهرم لزوجته بعد مكالمة تتهمها بالخيانة (خاص)

قال «حمادة»، فرد أمن بإحدى محلات السوبر الماركت الشهيرة، والد ضحايا جريمة الهرم التي راح ضحاياها أم وأولادها الثلاثة على يد مالك محل أدوات بيطرية، أمام جهات التحقيق، إنه تلقى اتصالًا من رقم غريب يخبربه إن «زوجته بتخونه»، وإنه لما «واجه زوجته (زيزي) بالكلام دا حصلت مشادة بينهم، وقعدت تعيط وكانت مصدومة ومش عارفة مين اللي قال كده ولا جاب الكلام دا منين).
نص أقوال والد ضحايا جريمة الهرم
مكالمة غامضة أشعلت الشكوك قبل المأساة.. أقوال والد ضحايا جريمة الهرم (خاص)
وأضاف والد ضحايا جريمة الهرم، في الجزء الرابع من أقواله التي حصلت «المصري اليوم» على نسخة منها، إن بعدها بأيام «مراته كلمته وقالت له إنها عايزة ترجع بيتها، وإنه فعلًا جه يوم الجمعة الموافق 2025/9/26 عشان يرجعها، لكن قبل ما يوصل كانت اتزحلقت في المطبخ ورجليها اتكسرت، فخدها وراح بيها المستوصف في شبرا الخيمة، وهناك الدكتور عمل لها أشعة وقال إن فيها كسر في كعب الرجل اليمين، وبعد ما جبسها، خدها ورجع بيها البيت».
التفاصيل الكاملة لأقوال والد الزوجة ضحية جريمة الهرم
«مراتي رفضت ترجع لي.. وسابت البيت 3 مرات ومارجعتش».. نص أقوال والد ضحايا جريمة الهرم (خاص)
وإلى نص أقواله:
س: وما مضمون الحوار الذي دار بينك وبين سالف الذكر (إسلام)- شقيق زوجتك- بخصوص الاتصال الهاتفي الوارد لك؟ (شخص بيقول إن مراتك تخونك)
ج: هو اتعصب وقال لي إزاي الكلام دا حصل، وقال لي إني لازم أعمل محضر، وبالفعل عملت المحضر اللي قلت عليه.
س: ومتى واجهت زوجتك بذلك الاتصال الهاتفي؟
ج: كان بعد المكالمة دي بيومين أو ثلاثة، وساعتها أنا رحت لها بيت أمها عشان أشوف الموضوع دا.
س: وما الذي أسفرت عنه تلك المواجهة؟
ج: أنا قلت لها على اللي حصل، وزعقت وكنت متعصب جدًا، وهي كانت مصدومة من الموضوع وعيطت كتير ومش عارفة مين اللي كلمني، وإزاي حد عرف المعلومات دي عنها، وأنا من صدمتها ما بقيتش عارف هي فعلًا عملت حاجة غلط ولا لا، فرحت سبتها ومشيت، وما اتكلمناش بعدها لحد ما هي اللي كلمتني وقالت لي إنها عايزة ترجع البيت.
اقرأ أيضًا| «كل ما أحاول أقرب من مراتي ترفضني».. نص أقوال والد ضحايا جريمة الهرم (خاص)
س: متى تحديدًا هاتفَتك زوجتك وقررت لك برغبتها في العودة لمسكن الزوجية؟
ج: كلمتني يوم 24 أو 25 شهر 9 اللي فات.
س: وما مضمون ذلك الاتصال الهاتفي؟
ج: قالت لي إنها خلاص عايزة ترجع البيت.
س: وما أثر ذلك عليك؟
ج: أنا وافقت وقلت أرجعها خلاص ونكمل حياتنا، وكمان ساعتها كان وقت دخول مدارس، فأنا كنت عايز ولادي يخشوا المدرسة وما يتأخروش.
س: أذكر لنا كيفية رجوع زوجتك لمسكن الزوجية؟
ج: أنا رحت يوم الجمعة 2025/9/26 بيت أمها عشان أرجعها، وبالصدفة اليوم دا كانت مراتي عند أهلها، وقبل ما أوصل كانت اتزحلقت في المطبخ ورجليها اتكسرت، فأنا لما وصلت خدتها وروحنا مستوصف، وجبست لها رجليها، وبعدها خدتها ورجعنا على بيتنا.
اقرأ أيضًا| «الأم سابت البيت ومعاها العيال».. القصة الكاملة لجريمة الهرم كما وردت في محضر المباحث (خاص)
س: ما كيفية حدوث إصابة زوجتك؟
ج: هي اتزحلقت في المطبخ في بيت أمها ورجليها اليمين اتكسرت.
س: وما الإجراءات الطبية التي اتُّخذت حيالها؟
ج: أنا وديتها مستوصف في شبرا الخيمة اسمه «أبوالهنا»، والدكتور عمل لها أشعة وقال إن فيه كسر في كعب رجليها اليمين، وجبس لها رجليها، وقال إنها المفروض تعمل عملية بعد أسبوع.