ضرب وتريقه واحتجاز.. اعترافات مثيرة ل سامر المدني مطرب المهرجانات بعد سجنه

حصل صدى البلد على نص اعترافات مطرب المهرجانات سامر المدني، في اتهامه ووالده وأخر بالتعدي على شخص وتعذيبه وتصوير مقاطع فيديو لاحتجازه بالجيزة.
ضرب على القفا وشتيمة.. سامر المدني ووالده صورا ضحيتهما فيديو|تفاصيل
ضحية سامر المدني مطرب المهرجانات: ضربوني وصوروني عريان علشان يكسروا عيني| تحقيقات
نص أقوال مطرب المهرجانات سامر المدني
س/ ما تفصيلات إقرارك ؟
ج/ اللى حصل انى كنت قاعد في المكتب وواحد صاحبي كلمني و قالي ابوك مسك حرامي ولما روحتله لقيت محمد عباس عيد ده والناس بتضرب فيه وابويا في النص بين الناس وكان التيشرت بتاعه متقطع قمنا واخدينه على المكتب عشان في الشارع ممكن حد يصورنا ولما طلعنا ابويا معاه وبعد كده اخده في غرفة لوحده و انا كنت سامع زعيق من جوه وبعد كده احنا دخلنا المكتب وابويا كان بيضربه بالاقلام على وشه و قام مقلعة من هدومه وقعد يصوره فيديو وهو قلع هدومه وبالشورت اللى كان تحت البنطلون، وبعد كده نزلنا قعدنا على القهوة وطلبنا النجدة بس محدش جه ولما كلمناهم تاني قالو لابويا هاتوه وتعالوا على القسم وقمنا واخدينه و رايحين على القسم وعملنا محضر واتعرضنا على النيابة النهارده وده كل اللى حصل.
س/ متى وأين حدث ذلك ؟
ج/ امبارح الموافق 2022/10/3 الساعة 11:3 مساءً في المكتب الخاص بينا اللي في 3 شارع محمد سالم متفرع من شارع الهرم.
س/ ما سبب ومناسبة تواجدك بالمكان والزمان سالفي الذكر؟
ج/ أنا نزلت من المكتب لما قالولي ان ابوك في مشكلة.
س/ ومن كان برفقتك في ذلك الوقت؟
ج/ كان معايا ابويا وحازم خالد مهدي وناس تانيه كثير.
س/ وما هي طبيعة علاقتك بالمجنى عليه؟
ج/ أنا شفته قبل كده في المكتب عندنا وابويا كان بيزعق فيه جامد وبيقولو انت ازاى تيجي لحد هنا برجلك ولما سألته مين ده قالى انه على علاقة بطليق مراته الحالية وانا قولتله طب خلاص ماشيه.
س/ وهل توجد ثمة خلافات فيما بينكم؟
ج/ ايوه في خلافات.
س/ وما هي طبيعة تلك الخلافات؟
ج/ هو الخلافات مش بيني وبينه هو كل الخلافات بينه وبين ابويا.
س/ وما الذي ألت إليه تلك الخلافات؟
ج/ هي وصلت دلوقتى إلى الواقعة اللي حصلت دلوقتي.
س/ وما هي علاقة كلا من هبة زوجة اباك ومريم ابنتها بالواقعة؟
ج/ محمد عمل كل ده عشان هو واخد وعد من أبو مريم اللي هو اسمه خالد انه هيجوزها ليه لما ترجعله وهبة دي تبقى زوجة أبويا وام مريم هى أصلا طليقة خالد اللي كان بيخلي محمد يسأل عنها.
س/ وما هى بادرة لقائكم بالمجني عليه إبان حدوث الواقعة .
ج/ أبويا كان ماسك فيه وبيبعد عن الناس عشان احنا كنا عايزين نبعده عن الناس عشان نخده على المكتب بتاعنا عشان محدش يصورنا.
س/ من كان برفقتك انذالك؟
ج/كان معايا ابويا وحازم وناس كثير من الشارع.
س/ وأين تقابلت مع المجنى عليه؟
ج/انا قابلته في شارع السلام متفرع من شارع ترسا تحت بيت ابويا.
س/ وما الذي حدث آنذاك؟
ج/ بعد ما بعدنا الناس أبويا ركبه توكتوك وراح بيه على المكتب و احنا روحنا على المكتب مشى.
س/ ما هي مواصفات العقار الذي دلفتم إليه؟
ج/ هو برج حوالي عشرة أدوار هي شقة في الدور الأول فيها ثلاثة أوض الاوضتين فيهم مكاتب بنقابل فيه الناس اللى بتيجي تتفق على حفلات.
س/ وما هي حاله المكتب الخاص بكم من حيث العملاء؟
ج/لا مكنش فيه حد موجود.
س/ وهل قام المجنى عليه بالدلوف إلى المكتب بصحبتكم؟
ج/ ايوه هو دخل معانا المكتب.
س/ وما هي مواصفات المكتب الذي قمتم بالدلوف إليه بإرادتكم وقهرا على المتهم؟
ج/ هي شقة في الدور الأول فيها ثلاثة قوض الاوضتين فيهم مكاتب بنقابل فيه الناس اللى بتيجى تتفق على حفلات.
س/ وما الذي اغتمر على ذهنك في ذلك الوقت؟
ج/ انا كنت عايزه يمشي بس ابويا قالي احنا هنوديه القسم.
س/ وما هي الأفعال المادية التي قمتم بها بالمجنى عليه عقب دلوفكم إلى المسكن سالف الذكر؟
ج/ ابويا اخده على الأوضة اللى جوه وسمعنا صوت زعيق أبويا وقمنا داخلين لقيناه متعصب على الواد وبيضربه بالأقلام على وشه اكتر من مرة واحنا فضلنا معاه في الأوضة شوية وابويا كان بيضربه وأنا كنت بنتريق عليه بس.
س/ وما هو سبب قيامكم بتجريد المجنى عليه من ملابسه؟
ج/ أنا مش عارف عشان انا مكنتش موجود ساعت لما قلع هدومه.
س/ وهل كان بإمكان المجني عليه الخروج من العقار سالف الذكر؟
ج/ لا طبعاً مكنش يعرف يخرج من نفسيه.
س/ وما الذي حال دون ذلك ؟
ج/ عشان احنا كنا في المكتب وابويا كان مقعده في الأوضة ومكنش بيتحرك من مكانه.
س/ وهل كنت على علم مسبق بمكان تواجد المجنى عليه في ذلك الوقت؟
ج/ لا انا عرفت لما حد كلم ابويا قاله ان في واحد بيسأل عليه في الشارع.
س/ وهل قمت ببث الرعب في نفسه بطريقة الترويع من ما يمكنك فعله به؟
ج/ احنا مهددناش حد بس هو كان خايف لوحده.
س/ وما هي المدة الزمنية المستغرقة في ارتكابكم تلك الواقعة؟
ج/ كانت حوالي أربعة ساعات.
س/ هل حاول المجني عليه رد الاعتداء الواقع عليه في ذلك الوقت؟
ج/ لا هو معملش اى حاجه ولا قدر يعمل أي رد فعل.
س/ وما هو سبب عدم إتيان المجنى عليه اى رد فعل على تعديكم عليه؟
ج/ عشان ابويا كان مقعده جمبه وكان بيضربه.
س/ وهل قمت بالتعدي على المجني عليه في ذلك الوقت؟
ج/ لا انا كنت معاهم في المكان ومعا ابويا بس.
س/ وما هي وجهتك بالنسبة للمجني عليه ووجهة المجني عليه بالنسبة إليك؟
ج/ هو فضل معانا أربعة ساعات وانتقلت في اكثر من مكان.
س/ وهل حاول المجني عليه الاستغاثة ورد الاعتداء الواقع عليه؟
ج/ لا هو مطلعش صوت.
س/ وما هو سبب عدم قيامه بالاستغاثة
ج/ عشان هو كان خايف الناس اللي في المكتب وأكيد بعد الضرب.
س/ وما هو الباعث على ارتكابك لتلك الواقعة؟
ج/عشان دي كانت مشكلة ومع ابويا.
س/ وهل تلك الاسباب هي التي دعتك على ارتكاب تلك الواقعة في ذلك الوقت؟
ج/ اكيد عشان ده ابويا.
س/ وما هو مقصدك من ارتكاب تلك الواقعة؟
ج/ عشان الواد ده يخاف وميجيش عندنا تاني.
س/ وما تفصيلات ضبطك وعرضك علينا؟
ج/ انا اللي روحت على القسم عشان اعمل محضر وكنت واخد معايا محمد عباس عيد.
س/ وهل أجبرك أحد على الادلاء بتلك الاقوال؟
ج/ لا انا محدش اجبرني.
س/ هل من ثمة تفتيش انصرف الى شخصك؟
ج/ ايوة
س/ وما الذي اسفر عنه ذلك التفتيش؟
ج/ هما اخدو منى الموبيل ومبلغ 500 جنيه تقريباً
س/ ما قولك في ما جاء بمحضر الشرطة المؤرخ في 2022/10/4 والثابت به في ما قرره المجني عليه من اقواله تلوناه عليه؟
ج/ اللي حصل انا قولت عليه.
س/ هل لديك ثمة سوابق جنائية مماثلة؟
ج/ أنا عندى سابقة اتهام ضرب في المحضر 10436 جنح العمرانية وأخدت فيها إخلاء سبيل.
س/ هل لديك ثمة سوابق جنائية غير مماثلة؟
ج/ لا انا معنديش اى حاجه تانيه.
س/ انت متهم بهتك عرض المجنى عليه بأن قمت انت وكلا من المتهمين/ عمرو محمد رمضان احمد المدني، 2/ حازم خالد مهدي بحصر ملابسه عنه وتصويريه قاصدين من ذلك هتك عرضه على النحوالمبين بالتحقيقات؟
ج/ اللى حصل انا قولته فوق.
س/ أنت متهم وكلا من المتهمين عمرو محمد رمضان احمد المدني - حازم خالد مهدي بخطف واحتجاز المجني عليه بأن قمتم بتكبيله والامساك به وحجزه وتقيد حريته وقمتم باصطحابه على الشقة الخاصة بالمتهم عمرو محمد رمضان المدني عن طريق الاكراه الواقع عليه وتمت جريمتكم بناء على ذلك الاكراه على النحو المنين بالتحقيقات؟
ج/ اللى حصل أنا قولت عليه بس احنا اخدناه من الشارع إلى المكتب عشان منتصورش.
س/ انت متهم بالتعدى على المجنى عليه بالضرب واحداث اصابته كما جاء بتقرير الكشف الميداني على النحو المبين بالاوراق؟
ج/ احنا عملنا كده عشان مكناش عايزينه يجي تاني.
س/ هل لديك أقوال أخرى؟ لا
تمت أقواله وتوقع منه/ سامر عمرو محمد رمضان
الحكم بالسجن على المتهمين في القضية
وقضت محكمة جنايات جنوب الجيزة، الثلاثاء، برئاسة المستشار مجدي أحمد مصطفى، وعضوية المستشارين سعيد أيوب يوسف، وسامح رمزي، وإيمان الإمام على، بمعاقبة المتهم سامر المدني مغني المهرجانات الشهير، واثنين آخرين، بالسجن 3 سنوات، بتهمة الخطف وهتك العرض والضرب، وحيازة سلاح أبيض وعصا خشبية "شومة".
أحيلت القضية المتهم فيها مغني المهرجانات سامر المدني، والتي حملت رقم 19123 لسنة 2022، جنايات الطالبية، والمُقيدة برقم 3489 لسنة 2022، كُلي جنوب الجيزة بتهمة خطف وهتك عرض وضرب وحيازة سلاح أبيض وشومة، والمتهم فيها 3 متهمين من ضمنهم المتهم سامر عمرو محمد 17 سمة، وشهرته سامر المدني، مغني مهرجانات على مواقع التواصل الاجتماعي.