«منتهى الاستفزاز».. شريف إكرامي: «بيراميدز مستحيل ياخد مكان الأهلي والزمالك»

يرى شريف إكرامي، حارس مرمى الفريق الأول لكرة القدم بنادي بيراميدز، أن فريقه منافس لناديي الأهلي والزمالك، داخل الملعب فقط.
وقال شريف إكرامي، خلال حواره في بودكاست «ابن كارك»: «الأندية بتتعامل معانا أكنهم بيلاعبوا الأهلي والزمالك، بالتأكيد بنحس بحتت نفسية من اللاعبين».
وأضاف: «أكتر حاجة بتستفزني إن لاعب كان بيلعب في الأهلي أو الزمالك ويجيب هدف في بيراميدز يعمل شعار الأهلي أو الزمالك! إنت بتعمل إيه يابني، إنت كده مش بتحترم النادي اللي إنت بتلعب فيه».
وأوضح: «احنا هنا لما ناخد انطباع عن حد صعب نغيره، بيراميدز الظروف اللي تم إنشائه فيها كان فيها تحدي وكذا رسالة مبطنة بكسر الهيمنة وقلب الموازين، فالناس حطت بيراميدز في الحتة دي، عشان تغير الانطباع ده محتاج وقت ومجهود عشان الناس تحس إن مفيش ندية».
وتابع: «أنا مقتنع بكدة، أنا مقتنع مفيش أي منافسة بين بيراميدز والأهلي والزمالك إلا في الملعب، بيراميدز منافس قوي على كل البطولات داخل الملعب، إنما بيراميدز خارج الملعب، المساحة من حيث الشعبية والجماهيرية والتاريخ بيراميدز مش منافس فيها خالص»
وواصل: «مهما بيراميدز خد بطولات وحقق نجاحات مستحيل ياخد مكان الأهلي والزمالك، أنا بسمع بيراميدز خد مكان مين، حاجة في منتهى الاستفزاز».
وأكمل: «بيراميدز بدري أوي عشان ياخد مكان الأهلي أو الزمالك، لأن الأهلي والزمالك لهما تاريخ كبير وشعبية اتبنت في سنين طويلة، مش معنى نادي خد بطولة تقول ده خد مكان النادي ده، الحاجات دي ليها أغراض أخرى»
وأتم: «بيراميدز لو استمر على هذا النهج ممكن يلاقي قاعدة جماهيرية ترتبط بيه بعيد عن الأهلي والزمالك، مفيش حد أهلاوي أو زملكاوي فجأه هيشجع بيراميدز»