«ده اللي المفروض بيدير الملف!».. أمير مرتضى يهاجم أيمن ممدوح عباس بسبب زيزو

هاجم أمير مرتضى منصور، المشرف العام السابق على فريق الكرة بنادي الزمالك، أيمن ممدوح عباس، بسبب فشل التجديد مع أحمد سيد زيزو، لاعب الأبيض.
ولم يتمكن الزمالك من تجديد عقد زيزو بعد مفاوضات عدة بين الثنائي، وسط تقارير إعلامية تشير لقرب انتقاله من الأهلي.
وقال أمير مرتضى في تصريحات عبر منصة «المشهد»: «اللي وصلنا للنتيجة دي في موقف زيزو، أول حاجة ليها علاقة بالاستقرار أي لاعب بيحب يكون في مكان مستقر، وهو 90% ميال للزمالك، صفقة تجديد زيزو بالنسبة لي صفقة سهلة جدًا، لاعب مشروع زملكاوي والزمالك عمله وهو بيعترف بكدة».
وأضاف: «ليه ده محصلش في الزمالك؟ لأن النادي مفيهوش شخص بياخد قرار، وممدوح عباس هو اللي بياخد القرار، لما يكون رئيس النادي الحقيقي اللي هو ممدوح عباس، ابنه أيمن، اللي هو رجل أعمال، يطلع يقول تصريح، في صحفي بيسأله عن تجديد زيزو، قاله أنا وجهة نظري إن كل اللاعيبة بتجري نفس المسافة فالمفروض ياخدوا نفس الفلوس».
وأكمل: «هو علاقته بالرياضة إنه ممول هو ووالده للنادي وأبوه رئيس النادي السابق، أنا لو زيزو وعندي معاد بالليل عشان نخلص الموضوع والناس شايفاني بجري كدة والكورة بقت عبارة عن عدادات عربية، لو كدة بقى يبقى حارس المرمى مياخدش فلوس عشان مش بيجري».
وتابع: «ده الشخص اللي المفروض بيدير الملف ماليًا هو ووالده. وأنت قادر تحط إيدك في المفاوضات طرف زيزو، اللي هو والد زيزو، لكن مش بتسمع حد غيره، إنما في الزمالك بتسمع عمرو الجنايني، ممدوح عباس، ميدو، أحمد سليمان، حسين لبيب، هشام نصر، عمرو أدهم، كل يوم خبر، أنت مش عارف تشاور على حد، وهنا زيزو يعرف يضغط عليهم بورقة ضغط ومبرر أنتم مش جديين».