ضحية حادث طريق الواحات تكشف التفاصيل: «كنا نازلين نشتري فستان حفل التخرج»

روت «رنا»، إحدى ضحايا حادث مطاردة طريق الواحات، تفاصيل الساعات التي سبقت وقوع الحادث، حيث تحدثت عن لحظات عادية كانت تجمعها بصديقتها قبل أن تتحول إلى مأساة.
وقالت رنا: «صحيت الصبح وقلت لصاحبتي تعالي ننزل نفطر ونشرب قهوة ونقعد نتكلم.. يعني زي أي بنات طبيعيين بيحبوا يخرجوا ويتكلموا عن اللي حصل في حياتهم كان يوم عادي، كنا نازلين نضحك ونفرفش شوية».
وأضافت رنا خلال لقائها مع الإعلامية نهال طايل في برنامج «تفاصيل» المذاع على قناة صدى البلد 2: «كمان كنت عايزة أشتري فستان لحفلة التخرج، فقلنا نستغل اليوم نخلص كذا حاجة... كنا بنتكلم ونضحك وفجأة اتحولت الضحكة لكابوس».
ولم تتمالك رنا نفسها من البكاء خلال الحديث، مؤكدة أن ما مرت به لا يمكن وصفه، وأن لحظات السعادة البسيطة تحولت في لحظة إلى معاناة مؤلمة لا تزال آثارها الجسدية والنفسية مستمرة حتى الآن.
وأوضحت: «فطرنا وشربنا القهوة وقعدنا شوية، لكن حسينا إننا مش مرتاحين في المكان، فقررت أقول لصحابي: يلا نمشي وبالفعل ركبنا العربية، وبدأنا نتحرك».
وأضافت: «أول ما بدأنا نتحرك، لقينا كذا عربية خرجت ورانا من عند الكافيه، حسيت إن في حد مركز معانا بشكل غريب، وبدأوا يفتحوا الشبابيك ويكلمونا، ويجوا ناحيتنا بالعربيات».
وتابعت باكية: «أنا لسه متعلمة السواقة جديدة، ومعرفش أتصرف تحت الضغط ده، وسواقتي كبنت أكيد مش زي سواقة راجل، بدأوا يضغطوا عليا يمين وشمال ويكلموني بصوت عالي، وأنا بتوتر».
ثم روت اللحظة الفارقة التي أدت للحادث: «كنت ماشية على طريق الواحات، وفجأة لقيت عربية نقل واقفة أقصى الشمال، دي حاجة أول مرة أشوفها، ومكنش عندي مساحة أعدي أو أقصى يمين اتحشرت، واصطدمت بالعربية النقل، وده اللي قلب حياتنا في لحظة».
وأكدت رنا أن ما حدث لم يكن مجرد حادث عادي، بل مطاردة متعمدة من شباب أرعبوهن حتى وقعت الكارثة. وختمت حديثها قائلة: «كنا بنحاول نضحك ونفرفش زي أي بنات، لكن اللي حصل خلى الضحكة تتحول لصراخ.. ومش قادرة أنسى اللى حصل».