قبل جلسة مفاوضاته مع الزمالك.. حمزة علاء يفاجئ جماهير الأهلي برسالة

وجه حمزة علاء حارس الأهلي السابق، رسالة إلى جماهير القلعة الحمراء، في أعقاب رحيله عن الأحمر، بعد انتهاء عقده وعدم التجديد له.
وكتب حمزة علاء في ستوري عبر «إنستجرام»: «أكيد الكلام جاي متأخر، وعشان كده حابب أعتذر. من حوالي شهر أخدت أصعب قرار في حياتي، وهو إني أسيب بيتي بعد 16 سنة من عمري قضيتهم جوه النادي الأهلي».
وتابع: «قرار الرحيل كان صعب، بس كان لازم أفكر في مستقبلي. يمكن الفرصة مجتش زي ما كنت بتمنى، بس كل حاجة بتحصل بيبقي ربنا سبحانه وتعالى كاتبها ورب الخير لا يأتي إلا بالخير».
أضاف: «لجمهور النادي الأهلي العظيم، محبتكم وتقديركم عمرهم ما كانوا مرتبطين بعدد الدقايق اللي لعبتها، دايمًا كنتوا سند، في كل لحظة، في كل بطولة. حسيت معاكم إني أحسن حارس في العالم وأنا بلعب في بطوله أفريقيا والأولمبياد. كل اللي بطلبه، إنكم تفضلوا فاكرين إني كنت واحد منكم، ابن من أبناء النادي الأهلي».
وتابع: «لإدارة النادي بقيادة محمود الخطيب، شكرًا على كل لحظة حسيت فيها إني جزء من الكيان».
وأكمل: «لزمايلي، إنتوا إخواتي وعيلتي اللي عمري ما هنسى أيامها وبتمنى ليكم كل التوفيق والنجاح. ولكل مدرب اتمرنت معاه داخل النادي، شكرًا من كل قلبي على كل لحظة دعمتوني فيها أو علمتوني فيها حاجة. ولكل عامل تشرفت بالشغل معاه، إنتم عارفين ‏معزتكم عندي».
وأتم: «لشعب الأهلي، هفضل دايمًا مشجع للكيان، من قلب التالتة شمال. ويارب أرفع راسكم وأكون عند حسن ظنكم في خطوتي الجاية، وتكونوا ‏دايمًا في ضهري وسند ليا زي ما طول عمركم عودتوني. أشوف وشكم على خير».
كانت «المصري اليوم» علمت من مصدر داخل الزمالك أن هناك جلسة بين جون إدوارد المدير الرياضي ووكيل حمزة علاء من أجل معرفة رأي اللاعب في الانضمام لصفوف الأبيض.