حمزة علاء يودع الأهلي: 16 عاما في بيتي.. والرحيل كان القرار الأصعب

وجّه حمزة علاء، حارس مرمى الأهلي السابق، رسالة مؤثرة لجماهير القلعة الحمراء ولإدارة النادي، بعد إعلان رحيله عن الفريق، ملمّحًا إلى خطوته المقبلة في مشواره الكروي.
وكتب علاء، عبر حسابه الشخصي على موقع "فيسبوك":" أكيد الكلام جاي متأخر، وعشان كده حابب أعتذر،. من حوالي شهر أخدت أصعب قرار في حياتي، وهو إني أسيب بيتي بعد 16 سنة من عمري قضيتهم جوه النادي الأهلي".
وأضاف:" قرار الرحيل كان صعب، بس كان لازم أفكر في مستقبلي. يمكن الفرصة مجتش زي ما كنت بتمنى، بس كل حاجة بتحصل ربنا سبحانه وتعالى كاتبها، ورب الخير لا يأتي إلا بالخير."
ووجّه رسالة خاصة لجمهور الأهلي قائلاً:" محبتكم وتقديركم عمرهم ما كانوا مرتبطين بعدد الدقايق اللي لعبتها. كنتوا دايمًا السند، في كل لحظة وفي كل بطولة، حسيت معاكم إني أحسن حارس في العالم وأنا بلعب في بطولة إفريقيا والأولمبياد."
وتابع:" كل اللي بطلبه إنكم تفضلوا فاكرين إني كنت واحد منكم.. ابن من أبناء النادي الأهلي."
كما وجه الشكر لإدارة النادي برئاسة الكابتن محمود الخطيب، وزملائه في الفريق، وكل من عمل معهم في النادي قائلاً:" شكرًا على كل لحظة حسيت فيها إني جزء من الكيان.. أنتم إخواتي وعيلتي اللي عمري ما هنسى أيامها، ولكل مدرب وعامل دعمني أو علّمني حاجة، شكرًا من كل قلبي."
واختتم رسالته برسالة وفاء لجمهور الأهلي:" هفضل دايمًا مشجع للكيان، من قلب التالتة شمال. يا رب أرفع راسكم وأكون عند حسن ظنكم في خطوتي الجاية، وتفضلوا دايمًا في ضهري زي ما طول عمركم عودتوني. أشوف وشكم على خير... ابنكم حمزة علاء."