«رايح يصلح ماسورة ميّه.. فوجد تسرب غاز الواحات».. عين «أحمد» اليسرى فقدت قدرتها على الإبصار و«سيف» يطلب حقه (معايشة)

«أنا أول ما دخلت عليه ما عرفتهوش.. كان كله حروق، ملامحه راحت، عينه الشمال مبقتش تشوف كويس، رجله العضم باين منها، وإيده محتاجة عمليتين، وضهره كمان، وبيقول لى: عايز أرجع زى الأول يا أمي»، هكذا بدأت «عزيزة»، والدة أحمد مصطفى، حديثها من على كرسى الانتظار داخل أحد المستشفيات الحكومية، حيث يرقد ابنها منذ انفجار ماسورة الغاز قرب منطقة الواحات، غرب سوميد، قبل نحو 15 يومًا.
«فضلت أزعق للناس ترجع قبل ما يولع فيّا الغاز»
أحمد، ابن ال23 عامًا، لم يكن موظفًا حكوميًا، ولا عاملًا في شركة مرافق عامة، لكنه كان «عامل باليومية» في شركة مقاولات.. وفي يوم الحادث، تم استدعاؤه لإصلاح ما قيل له إنه «كسر في ماسورة مياه»، لكن رائحة الغاز كانت أول ما استقبله حين اقترب من الموقع.
«هو قال لهم من الأول: دى مش مياه، دى ماسورة غاز، وبدأ يرجّع العربيات اللى ماشية في الطريق، ملاكى وميكروباصات، وبيزعق للناس يمشوا»، تقول والدته وهى تُخرج صورة لابنتها «رانيا» في فستان الزفاف، يتوسطها «أحمد»، «هو اللى جهز أخته بعد ما أبوهم مات، سبنا من 5 سنين، وابنى شال المسؤولية، ساب المدرسة واشتغل مع المقاولين عشان يصرف علينا».
«الانفجار حصل وإحنا لسه في مكاننا»، يروى «أحمد» من سريره بالمستشفى، بصوت بالكاد يُسمع، «الناس اتفزعت، وناس جريت، وناس اتشوت، وناس ماتت، كنت عايز ألحق طفل صغير كان ماشى، قلت له: امشى ورايا، وفضلت أزعق للناس ترجع قبل ما يولع فيّا الغاز».
توقف لحظة، ثم أضاف ل«المصرى اليوم»: «أنا مش كنت مجرم ولا بلطجي، أنا كنت رايح أشتغل زى كل يوم، وعايز حقي».
«الناس بقت تنط مولعة»
المقاول الذي استدعاه لم يعُد يجيب على الهاتف، بحسب الأم، «هو اللى اتصل بيا الساعة 11 ونص بالليل يوم الحادث وقال لى: ابنك في المستشفى، ومن ساعتها اختفى، هو شغال مع جهاز المدينة من الباطن، ومحدش فيهم جه وسأل فينا».
الانفجار لم يُصب «أحمد» وحده؛ بل طال العديد من الأشخاص ممن تصادف مرورهم في تلك اللحظة، بينهم «سيف وائل هشام»، 17 عامًا، كان في طريقه للعمل في مطعم مأكولات شهير.
«أنا كنت راكب ميكروباص ورايح شغلى، حسيت بحاجة مش طبيعية، ريحة غريبة، تراب، وهاجس قال لى: انزل»، يقول «سيف» من على سريره في منزله عقب خروجه من المستشفى، أمس، بضمادة تحيط وجهه ويده، «لما نزلت النار مسكت في الميكروباص، والناس بقت تنط مولعة».
كان يحمل حقيبة على ظهره، «هى اللى حمت ضهري»، لكن النار التهمت وجهه ويديه، عندما حاول النزول، تعثرت قدمه في كرسى، فمسك بيد سيدة كانت ترتدى قميصًا «مولع»، جذبته خارج السيارة، لكن النار التهمتها «وماتت على طول».
«يا أمى مش قادر أتحرك»
«سيف»، طالب في الصف الثانى الثانوى الفنى، يعمل منذ عامين لإعالة أسرته بعد انفصال والديه، «أنا اللى بصرف على إخواتى: ساندى في تانية ابتدائى، ومحمد في رابعة، ونفسى أعمل عملية تجميل، أرجع أشتغل تانى، منظرى كده محدش هيرضى يشغلنى».
من جانبها، جلست والدته «سناء» في زاوية الغرفة، تحاول أن تبدو قوية، لكن صوتها انكسر، «أنا منفصلة، وابنى كان شايل البيت، بعد الحادث ده مين هيرضى يشغله؟ منظره اتغير، وشه اتحرق، ولسه عنده عمليات».
ورغم هول الكارثة، لم يطرق باب عائلة «أحمد» أو «سيف» أي مسؤول، «لا من شركة الغاز، ولا من جهاز المدينة، ولا حتى من الشركة اللى شغالة هناك»، كما تقول والدة الشاب العشرينى.
تؤكد الأم أن الجهاز كان يعلم بأن هناك تسريبًا، «ليه ما وقفوش الشغل؟ ليه ما جابوش شركة الغاز تتأكد؟ ليه ابني اللي مش تبعهم يدخل مكان خطر؟»، ثم تصمت قليلًا وتضيف: «هو لو ابن مسؤول في جهاز المدينة كان هيتساب كده؟».
الصور التي تُخرجها الأم من حقيبتها تظهر «أحمد» قبل الانفجار، بجسد قوى وابتسامة عريضة. «دلوقتى بيقول لى: يا أمى مش قادر أتحرك، أنا اتشويت وأنا بحاول أنقذ الناس».
«عايز أرجع زي الأول»
الأطباء قرروا إجراء سلسلة من العمليات لعلاج اليدين وكسور القدم والحروق في الوجه والظهر، «لسه قدامه شهور علاج، ومحدش عايز يتحمل مسؤولية».
تقول «عزيزة»: «إحنا مش عايزين غير حق ولادنا، اللى راحوا واللى لسه بيتعالجوا.. ابنى ما كانش بلطجى، كان بيروح شغله ورجع مولع».
وعلى سرير آخر، ينظر «سيف» ليديه ويهمس: «أنا مش عايز غير أرجع زى ما كنت، أرجع أشتغل، أرجع بنى آدم».
جنازة «منة» و«سما» وارتفاع عدد ضحايا حادث انفجار خط غاز الواحات
وفى ظهر أمس، شُيّعت جنازتا الطالبتين في كلية طب الأسنان بجامعتى القاهرة و6 أكتوبر، «منة الله» و«سما»، ضحيتى الحادث، من مسجد الحصرى في 6 أكتوبر، في جنازة اتشح فيها الميدان بالحزن، بينما علت أصوات النحيب.
«كانت رايحة الدرس وراكبة العربية مع مراتى (ناهد)- جدتها، وحصل الانفجار والسيارة اتحرقت، ومراتى اتفحمت وماتت في ساعتها، وحفيدتى راحت على المستشفى»، يقول ثروت الطويل، جد الطالبة «منة الله»، التي لفظت أنفاسها بعد 15 يومًا من الحادث.
ارتفع عدد ضحايا الحادث إلى 8 أشخاص، بحسب تحقيقات النيابة العامة، بينهم طفل، أغلبهم لا علاقة لهم بموقع العمل؛ بل كانوا من المارة أو الركاب الذين تصادف مرورهم لحظة الانفجار.