أنا كنت..عيدك

أنا كنت عيدك

تنقص نجوم السما.. أزيدك

الفجر يغرق.. آخد بإيدك

وأجمع سواد الألم بعينى

وأصب نبض الهوى فى وريدك

تموت آيات النغم فى حلقى

أنطق بسر الحياة أريدك

تكتب سنين الخرس نهايتى

أنطق بسر الوجود أعيدك

وإذا نسيتى حاكون نهايتك

وإذا وفيتى حاكون شهيدك

وكل ما ارحل حتكونى غايتى

وكل ما أرجع حاكون وليدك
سمعت هذه الكلمات والتى تغنى بها على الحجار يتمتم بها أحد الشهداء وروحه ترفرف حول ميدان التحرير.. حيران.. متسائل.. أنتم ليه لسة واقفين هنا؟!

المفروض أنكم دلوقت تكونوا فى اشغالكم بتشتغلوا وبتبنوا وبتصلحوا كل الخراب اللى عمله الفساد.. وتكونوا فرحانين أن الفسدة أخدوا جزاءهم!! لسة واقفين هنا فى التحرير ليه؟!!
فقلت له على استحياء.. أصل تقريبا كل اللى دمكم فى رقبتهم خدوا براءة!! واللى اتحكم عليهم بالمؤبد هيطعنوا وشكلهم كمان هيخرجوا براءة!!

الشهيد: براءة؟!! براءة؟!! يعنى إيه؟!! ليه؟!!! مستحيل.

أنا: يعنى مفيش دليل عليهم.. وفى بلدنا مفيش مستحيل..

الشهيد: دليل.. والناس اللى ماتت؟!! مش دليل؟! و اللى فقدوا نور عنيهم.. مش دليل؟!! وجثثنا على الأرض فى الميدان.. مش دليل؟! والرصاص والقناص اللى خطف روحى.. مش دليل؟!
- بيقولوا ان الأدلة دمروها.. أدلة غير كافية..

- وقلبهم؟ وضميرهم؟ دمروها كمان؟!! والإحساس كمان غير كافى؟!
ويسكت والدموع تنزل من عنيه زى النهر.. ويقول:

ودمى؟!! راح هدر؟!! طب وأمى.. حالها إيه دلوقت؟؟ أكيد لسة بتبكى بدل الدموع دم.. ونارها بقت نارين.. يا حبيبتى يا أمى ..ومصر.. أخبارها إيه؟!! بقى فيها حرية عيش عدالة اجتماعية؟!!

- ما تشغلش بالك كله تمام..
- تمام يعنى إيه؟!!

- تمام.. يعنى عملنا انتخابات مجلس شعب والإخوان والسلفيين خدوا أغلبية.

- سلفيين.. دول كانوا رافضين الثورة أصلا وبيقولوا عليها حرام.. والاخوان.. ليه دول نزلوا فى الآخر لما عرفوا أن الحكاية هتبقى جد!! إزاى.. طيب والنخبة والليبراليين والمثقفين.. فين صفوة المجتمع.؟!

- مش فاضيين.. أصلهم كل يوم فى الفضائيات.. بيهاجموا ويشجبوا وينددوا ويهددوا..
- وما بينزلوش للناس.. مابيجبوش حقهم؟!

- لا الإخوان هم إللى فى الشارع بيجيبوا أنابيب ومكرونة وسكر..
لكن الناس اتعلمت الدرس بعد كدة وعملنا انتخابات رئاسية فانتخبوا الفريق شفيق تقريبا عشان يصلحوا غلطتهم!!والإعادة بين الفريق شفيق والشيخ مرسى!!

- شفيق؟!! ما أنا مت وهو رئيس الوزراء..

- وطوابير البنزين دى ليه؟

- بيقولوا أزمة!! مش عارفين سببها وشفيق هيحلها ومفيش زمن وشفيق هيحلها.. ويقضى على البلطجية..

- والناس صدقت؟!

- بيقولوا هو اللى هيعرف يمشيها على عجين مانلخبطهوش.

- تانى عايزين يمشوا على العجين؟!! والحرية؟!

- ومين مرسى؟! إخوان؟!! الرئيس هييجى بالمكرونة والسكر هو مفيش فايدة؟ طيب عايز اسأل سؤال حارق قلبى..

- اتفضل.

- هو أنا مت ليه؟! كل الشهداء دول ماتوا ليه؟! عملنا ثورة ومتنا ليييه؟!!
- عايزنا نعمل ايه بقى؟ إحنا مايئسناش!! مازهئناش!! ماتنازلناش!! مابعناش دمكم!!!
- ما بعتوش دمنا أُمال مين اللى انتخب النظام تانى؟! ومين اللى انتخب اللى سرقوا الثورة؟!

ويكمل والحزن ماليه..

-كنا متعاهدين لما نزلنا الميدان.. ووقعوا قدام عيونا أحلى شباب اننا عمرنا ما هنتنازل عن حقهم.. عمرنا ما هنبيع دمهم واستشهدت وأنا مطمن أن دمى مش ممكن يروح هدر.. إيه اللى حصلكم؟!! عملتوا كده ليه..

-عملنا إيه بس؟!! تقريبا أن كل اللى اتعاهدت معاهم ماتوا فى نفس اليوم!!
نظر لى نظرة استغراب وتعجب وحزن.. ورجع يتمتم.. أنا كنت عيدك.. إذا نسيتى هكون نهايتك وإذا وفيتى هكون شهيدك.