محسن جابر: خسرت تحويشة العمر في لحظة وربنا عوضني في ساعة (فيديو)

قال المنتج الفني، محسن جابر، إنه «موعود بمحنة كل 25 سنة، لأنى كنت بحلم دائما إنى بطلع في أسانسير، وطاير لدرجة إني عديت في السقف، وطرت في السما بشكل متكرر، وبعدين أرضيته تتفتح، وأنزل من الارتفاع، وبعدها ارجع أطلع على السلم من تانى، فالحلم ده تحقق في 2003».
وأضاف «جابر»، في حوار لبرنامج «كلم ربنا»، مع الكاتب الصحفي أحمد الخطيب، عبر «الراديو 9090»: «أنا في قمة نجاحي دخلت جوة شركة ما، وكانوا بيكبروها، وكنت فاكر إنها هتبقي عالمية، لكن أتاريهم كانوا بيكبروا (الفرخة عشان يدبحوها)، وباعوا الشركة وأنا فيها، للمنافس بتاعي، وبعد ما كنت سيد موقفى أصبحت فرد جوة منظومة».
وتابع: «خسرت تحويشة العمر، وهنا جات لحظة ربانية، إن الشريك اللى اشترى، فكر يشتريني يعنى بيموتنى، وشرطه إنى أغير المهنة، وقالى: (اشتري نصيبي أو اشتري نصيبك)، فقلت أنا شاري، مكنش معايا 10% من المبلغ، وهنا ناجيت ربنا: «أنا في أزمة، ومحدش هيخرجنى منها غيرك، لأن المهلة 48 ساعة ومحتاج ملايين، وقلت يا رب أعمل إيه؟ فحسيت بتدخل ربانى جاى».
وأكمل: «قمت الصبح، ألاقي في مكتبي أنطوان شويري، ملك الإعلانات في المنطقة العربية، وقتها كنت لسه عامل قناة مزيكا، ولقيته بيقولى أنا هاخد حق رعاية الإعلانات، فحكيت له اللى حصل، وفى لحظتها كلمنى الشيخ وليد الإبراهيمي، وطلب يكلم أنطوان وقاله: «اللى عايزه محسن اعمله»، وهو ده الحل الرباني، عشان بعد ساعة لقيت المبلغ المطلوب في حسابي ملايين الدولارات ومخدش منى ورقة، وده تفسير الرؤيا، لأنى طلعت زي الأسانسير، ووقعت، ونزلت، وطلعت على السلم تانى».
وعن اقتراب مرور 25 سنة جديدة منذ 2003 حتى الآن، قال «جابر»: «أنا الآن في أقوي مشكلة بحياتى، لكن مش هحكيها، وحلها في إيد ربنا وحده، ومتفائل إن ربنا هيحلها، وثقتي في ربنا كبيرة جدا، واللى خلانى حى في الحادثة، ورعانى في حياتى، هيتدخل في الوقت المناسب بحل غير متوقع».
اقرأ أيضًا:
كل الشركات سابتني.. بيج رامي: فلّست ورجعت مصر مكنش معايا مصاريف بيتي
مبروك تم إيداع 81 تريليون دولار في حسابك.. خطأ كارثي في أحد البنوك (فيديو)
عايدة رياض: تزوجت محرم فؤاد كيدًا في نجم نادي الزمالك (فيديو)
ب2 مليون جنيه.. إيناس الدغيدي تكشف حقيقة حصولها على حقنة كل 6 أشهر (فيديو)