«شخصية كبيرة في البلد صالحتنا على بعض».. شوبير يكشف سر خلافه مع حسن شحاتة

كشف أحمد شوبير حارس مرمى الأهلي ومنتخب مصر السابق، لأول مرة عن سر خلافه مع حسن شحاتة المدير الفني السابق لمنتخب مصر.
وقال أحمد شوبير في تصريحات إذاعية اليوم الخميس: «أثناء بطولة الأمم الأفريقية 2008 في غانا كنت نائب رئيس اتحاد الكرة والمنتخب كان في غانا ومنتخب مصر بيكسب والدنيا تمام، وفوجئت بالكابتن سمير زاهر رحمة الله عليه بيكلمني من غانا بيقول لي طلع شيك مكافآت اللاعبين، قلت له شيك أيه أنتوا في غانا أيه سبب الاستعجال قال لي معلش عشان خاطري أمضي على الشيك».
اقرأ أيضًا: أول تعليق من مدرب ليفربول على إهدار صلاح ركلة جزاء أمام ريال مدريد
وتابع شوبير: «في ذلك التوقيت كان طاهر النجار مدير حسابات اتحاد الكرة وجاء لي وطلب مني تجهيز الشيكات قلت له ماشي بس عندي وقت معين لازم أمشي فيه، فالمهم قعدنا كان فيه شوية حاجات في الاتحاد وكانت كلها على دماغي عشان كل الأعضاء في غانا، وقعدت عدة ساعات والشيكات منزلتش فقلت لطاهر النجار أنا ماشي لإن عندي شغل قال لي قدامي ييجي ساعة قلت له متأسف أنا جاي بكره نبقى نمضي الشيكات».
وأوضح شوبير: «يدوب رجعت البيت لقيتهم بيكلموني تاني بيقولوا لي هنيجي نمضي الشيكات عندك في البيت فقلت أنا محبش كده خلصت ومادام مشيت مش بعمل حاجة هذا المبدأ غير مقبول بالنسبة لي، بعد كده فوجئت الدنيا قامت عليّ والموضوع وصل لأكبر ناس في البلد، وفيه أيه يا شوبير أنت مش بتمضي الشيكات ليه وكابتن حسن شحاتة زعل وغضب غضبا شديدا ومن هنا كانت بداية الخلافات مع كابتن حسن شحاتة».
وأضاف شوبير: «كابتن سمير زاهر كلمني قال لي أنت عامل لي أزمة وكابتن حسن شحاتة زعلان هنا، قلت ليه يا كابتن سمير أنا رايح بكره الاتحاد هما هيصرفوا الفلوس دي بالليل يعني ده انتوا لسه في غانا، ومضيت الشيكات تاني يوم عادي وعرفت لعد كده إن ليهم ترتيبة في تجهيز الشيكات بس أصلا مش هتعملها غير لما يرجعوا مصر».
واختتم شوبير: «بسبب هذه الواقعة قعدنا أنا وكابتن حسن شحاتة في حالة غضب من بعض لغاية ما جمعتنا شخصية كبيرة في البلد مع بعض واتصالحنا وتصافينا وانتهت المشكلة والجفوة إلى غير رجعة».