«مايليقش بالأهلي».. الشريعي يهاجم شادي محمد ويؤكد: «مش بنلعب على علبة كحك» (خاص)

شن أيمن الشريعي رئيس نادي إنبي، هجوما لاذعا ضد شادي محمد رئيس جهاز الكرة النسائية بالنادي الأهلي، بعد تصريحاته الأخيرة المثيرة للجدل.
وقررت نورا سمير، حكم مباراة إنبي والأهلي، في الجولة التاسعة من بطولة الدوري الممتاز لكرة القدم النسائية، إلغاء المباراة بعد تأخر وصول سيارة الإسعاف، وألغيت المباراة بعدما انتظر طاقم تحكيم المباراة واللاعبات وصول السيارة، خلال المدة القانونية وهي 20 دقيقة كما تنص اللائحة.
وقال شادي محمد، في تصريحات خاصة ل«المصري اليوم»: «ما حدث أمر لا يليق بكرة القدم المصرية وموضوع غريب».، مضيفًا: «نادي إنبي افتكر فجأة إن سيارة الإسعاف غير متواجدة في ملعب المباراة».
وقال الشريعي في تصريحات ل«المصري اليوم»: «حزين إن حد بقيمة شادي محمد المنتمي للنادي الأهلي، يجهل الإجراءات الإدارية، كان قبل ما يقول كده كان راجع أي إداري في الأهلي وكان عرف إن عربية الإسعاف بيدفعلها رسوم، ولو هو بيقول إننا مخبيين العربية فياريت يطلع صورة الرسوم اللي بتثبت إننا دفعنا فلوس الرسوم».
وتابع: «شادي محمد شاف عربية الإسعاف بتاعت النادي ومكتوب عليها إنبي، وهي مش تبع مؤسسة حكومية، وشادي محمد المفروض يكون عارف كده، لكن أنا بأكد على إن شادي شاف العربية بعينه، وإحنا حاولنا نتصرف بسبب الخطأ اللي صدر من الإداري عندنا، ومن تاني بأكد على إننا مخبيناش عربية الإسعاف الحكومية».
وأضاف: «فيما يخص تصريح شادي محمد الذي قال به إننا خايفين من مواجهة الأهلي، فا إذا صح هذا التصريح بكل معانيه، فأنا بقول ما يصحش الكلام ده يخرج من لسان حد منتمٍ للأهلي، عمرنا ما شوفنا حد تبع منظومة الأهلي بيقول الكلام ده بالأسلوب ده، الكلام ده يتقال لما يكون حد بينظم دورة رمضانية وفي الآخر هياخد علبة كحك!!».
وعن عقوبة خصم 3 نقاط من فريق إنبي: «إحنا اللي غلطانين من الأساس، وأنا حولت الإداري للتحقيق، ولما أغلط ما ينفعش أطلع أرمي اللوم على حد تاني».