«الاستغراب جاي منين».. تامر أمين يعلق على أسعار مطعم الشيف بوراك في مصر

قال الإعلامي تامر أمين، إن الشيف التركي الشهير بوراك واحدًا من أشهر «الشيفات» في العالم ويتميز بطريقة مختلفة في إعداد الطعام خصوصًا اللحوم، موضحًا: «اتفتح المطعم من هنا وماسلمش بوراك من هنا، سيل من الجدل الشديد حول منيو بوراك وفواتير بوراك وأسعار بوراك».
وأضاف أمين خلال حلقته ببرنامج «آخر النهار» الذي يُعرض على قناة «النهار»: «خلوني الأول أقولكم قبل ما تعرفوا رأيي إني أنا مستغربكم، أنا بقولكم كدة مش علشان أنا ملياردير بس بسأل الاستغراب جاي منين، يعني مين اللي قالكم الشيف بورك واحد من أشهر الشيفات في العالم، لما يجي يفتح مطعم في مصر، هيفتح مطعم لمحدودي الدخل».
وتابع أمين: «يعني جبتوا التوقع ده منين، مين قالكم هيعمل حاجة زي أبوطارق والشبراوي وجاد، ده براند عالمي واحد من أشهر الشيفات وجاي بيفتح حاجات، بيبعلك ضلع اللحمة قد كدة»، مُضيفًا: «دة سنتي اللحمة دلوقتي هنا عند الجزار ب200 جنيه، فما بالك لما يديك هو فخدة، عايزه يبعهالك ب19 جنيه وربع؟!»
وأوضح أمين: «يا سادة يا كرام دة اسمه هو وغيره من من على هذه الشاكلة Fine dining يعني طعام فاخر، مطاعم بتقدم طعام فاخر للي عايز ينزه نفسه ويتدلع، اللي معاه يتدلع هيروح الحتت دي، وبيروحوا، بسم الله ما شاء الله مافيش كرسي فاضي».
وأوضح أمين أن أسعار مطعم الشيف بوراك متقاربة مع بعض المطاعم المصرية الشهيرة، مُشيرًا إلى أحد المطاعم المصرية الشهيرة التي تبيع كيلو «الكباب والكفتى» ب2400 جنيهًا، متابعًا: «مطعم الشيف بوراك طبعًا غالي بس هو قال أنا شيف غالي ومشهور، الغالي يحب الغالي واللي معاه يروحلي».