قصة فشل انتقال لاعب الزمالك السابق للأهلي وتدخل العامري فاروق ومحمود طاهر

كشف أحمد دويدار لاعب فريق كرة القدم الأول بنادي الزمالك السابق، عن كواليس توقيعه على عقود الانضمام للأهلي عام 2018.
قال أحمد دويدار خلال تصريحات فضائية عبر برنامج «اللعيب»: «مضيت عام 2018 على عقود الانتقال للأهلي وخدت فلوس من النادي ومارجعتش الفلوس دي، وخدت أكتر من مليون و800 ألف جنيه».
وأضاف: «حسام البدري ومحمود طاهر كلموني لما كنت رايح القادسية الكويتي، وقالوا لي إن هما محتاجين لخدماتي، وقبل 3 سنين جالي ناس من الأهلي عرضوا عليا فلوس كتير».
وتابع: «لما مشيت من الزمالك وكنت رايح القادسية، حسام البدري كلمني ومعه محمود طاهر وتاني يوم جالي فلوس كاش وفي الوقت ده كلمت كابتن إسماعيل عرفته إني عملت حاجة غلط إني مضيت على عقود الانتقال للأهلي لما مشيت من الزمالك، وبعدها عرفت إن إدارة الأهلي معترضة على التعاقد معي، وقولت لهم خدوا الفلوس اللي أنا أخدتها منكم، وأنا جايلي عرض من الاتفاق السعودي».
واستكمل: «حسام البدري كان متمسك بيا وقعدت مع ناس في الأهلي منهم العامري فاروق، وقولت لهم خدوا الفلوس وهاتوا العقود علشان أروح الاتفاق، وقبل غلق باب القيد بأسبوع قالوا لي (يا دويدار شوف حالك)، وقتها زعلت لأني كنت بتكلم معاهم من مدة علشان ألحق أرتب أموري، وقولت بقالي شهرين بتحايل عليكم وإنتوا تيجوا قبل القيد ما يقفل بأسبوع تقولوا شوف حالك، ولما اتكلمت مع العامري فاروق قالي الأهلي ضرك وأنا معترف بكدة».