السيسي يشهد احتفالية اتحاد القبائل العربية والعائلات المصرية بمناسبة ذكرى انتصارات أكتوبر

شهد الرئيس عبدالفتاح السيسي، احتفالية اتحاد القبائل العربية والعائلات المصرية بمناسبة ذكرى انتصارات أكتوبر، بإستاد العاصمة الإدارية الجديدة.
ووجه السيسي الشكر قائلا «أشكر كل من ساهم في هذه الاحتفالية سواء كان منظمات المجتمع المدني أو الاتحاد القبائل أو كل الناس اللي شاركت بالمحافظات، ونوجه التحية لكل شعب مصر».
وأضاف «طبعا لازم تفرحوا، وأنا عايز أقول لكم أن حكاية أكتوبر حكاية ملهمة ما بتنتهيش، والنصر اللي اتحقق ده ما كانش نصر بسيط، ده كان نصر وراه إرادة شعب كامل رفض الهزيمة وتحدى نفسه وتحدى ظروفه». قائلًا «بعد 67 كان كل النااس بيقولوا أنه مستحيل النصر لأسباب، خط برليف، التفوق الكبير والمقارنة اللي كانت مش في صالحنا، كله كان بيقول أنه مفيش فرصة للنجاح، لكن الشعب المصري رفض ده وتحدي نفسه وحقق الانتصار، وعلشان كده الانتصار ده غالي قوي والدفع فيه كتير من شبابنا، السلام اتدفع فيه كتير قوي على رأسه الرئيس الراحل محمد أنور السادات».
وأكد السيسي «إحنا دلوقتي في تحديات قدامنا أكيد، لكن بنفس الروح ونفس الإرادة والإصرار وزي ما نجحنا رغم ظروفنا الصعبة وقتها لازم تكونوا متأكدين يا مصريين إن احنا برضه بفضل الله سبحانه وتعالى، وبالعمل وبالإصرار هنعبر كل تحدي».
ووجه السيسي التحية لأبطال القصص التي عرضت خلال الاحتفالية وقال «عايز أشوف أنس لاعب أسوان ومش هنسى إن أنا أقول إن الحاجة فرحانة لازم نعمل حاجة باسمها في سينا، الحاجة فرحانة الست العظيمة اللي نموذج للمصرية البدوية السيناوية، ربنا يديها العمر والصحة بنقول لها متشكرين وأرجو إن احنا نوجه لها التحية، ونعمل حي باسم الحاجة فرحانة».
واختتم كلمته بالقول «مش هنسى أبدا أن أنا أوجه أيضا التحية لكل اللي ساهموا في الاحتفالية دي من الفنانين وأخص هنا بالذكر الفنان محمد منير وأرجو أنه إحنا أيضا نشكره على مساهمته وعلى إصراره على يكون متواجد معانا، ربنا يديه السعادة».