«كان بيسأل كتير.. وكولر زهق».. الجوادي يكشف مفاجآت في أسباب رحيل بيبو عن الأهلي

كشف خالد الجوادي، المترجم السابق ل مارسيل كولر، المدير الفني لفريق الأهلي، أسباب غضب المدرب السويسري من خالد بيبو، مدير الكرة السابق بالفريق، مما أدى إلى ترك الأخير لمنصبه.
وقال الجوادي خلال حواره عبر برنامج «هاتريك» عبر قناة «أون تايم سبوتس 2»: «علاقتي بكابتن خالد بيبو كانت قريبة جدا، وأنا شايف أنه اتظلم في الأهلي. خالد بيبو كان طول الوقت عايز يرضي كولر، وعايز يعرف كل صغيرة وكبيرة عشان يسهل الأمور على المدير الفني».
وأضاف: «كان في تواصل قوي جدا بيني وبين خالد بيبو، وتعلمت منه الكثير، وأنا شايف أنه اتظلم بأنه وضع في مقارنة مع سيد عبدالحفيظ من أول يوم تولى فيه المهمة، ووقتها كان الجمهور غاضبا من رحيل عبدالحفيظ، فأصبح الأمر بمثابة انتقام من خالد بيبو».
وتابع: «أنا بعتبر إن خالد بيبو اتظلم، ولم يحصل على فرصة كافية، والمشكلة إن كولر مدرب بيحب التفاصيل جدا، وخالد بيبو كان طول الوقت عايز يرضيه، وكولر مكنش قادر يستحمل، ومش قادر يتحمل إن بيبو لسه مخدش على الأجواء، وكابتن خالد كأن بيسأل كتير عشان يعرفه أكتر، يعني مش من باب السؤال فقط، وده بهدف أنه يعرف دماغ الراجل بتفكر ازاي».
وأتم: «بيبو كان بيسأل كولر في كل حاجة، مكنش بياخد القرار من دماغه وخلاص، وده اتحسب عليه للأسف في الأخر».