«سيبك من التيك توك إنت مش قادر تجري».. رسائل نارية من إبراهيم سعيد ل زيزو

وجه إبراهيم سعيد، نجم الأهلي ومنتخب مصر السابق، رسائل نارية إلى أحمد مصطفى «زيزو»، نجم الزمالك ومنتخب مصر، بسبب الأداء الذي ظهر عليه خلال مباراة منتخب مصر وبوركينا فاسو.
وقال إبراهيم سعيد في تصريحات تلفزيونية عبر فضائية «النهار»: «نفسي نفسي أشوف الكلام اللي بيتقال على زيزو، وأنه أحسن لاعب في مصر مع المنتخب».
وأضاف: «زيزو، في مباراة بوركينا فاسو، الوحيد اللي كان بيلعب في مركزه ومحمد صلاح، كان بيلعب باك رايت وده معناه إن حسام حسن، أعطى تعليمات إن زيزو يلعب مكان محمد صلاح، وصلاح ينزل لوسط الملعب».
وتابع: «أنا مش لعيب منتخب، عشان أمسك الكورة وألعبها لزميل قريب مني، أنا مش لعيب منتخب عشان ألعب كرات ثابتة أي حد يعمل كرات ثابتة».
وواصل: «أنا عاوز أشوف زيزو، إللي بيعدي بمهاراته أنا عاوز أشوف زيزو، إللي بيسدد على المرمى أو أشوف زيزو اللي بيعدي ويعمل ثرو باص لتريزيجيه، هي دي المكانة اللي محطوط فيها زيزو».
وواصل: «اللي بيعمله زيزو، مع المنتخب أي حد يعمله أنا لو نزلت ألعب هعمل اللي بيعمله أنا نفسي أشوف زيزو في مستواه»، مضيفًا: «زيزو مش مؤثر ولم يضيف للمنتخب، إحنا عاوزين نشوف زيزو، لعيب منتخب عاوزين نشوف زيزو، لعيب دولي».
وأشار: «أنا دايمًا بشوف لزيزو، فيديوهات مع أحد الأشخاص بيقعد يطلع جبل ويجري في الجبل ده غلط، لما تشتغل مع حد اشتغل مع حد عنده خبرات وعنده إمكانيات يعرف يطور من مستواك، لكن إن أشوف واحد عمال يطلع في جبل وينزل في جبل أنا شايف إن الكلام ده مفيهوش أي إفادة خلاص».
وأردف: «معظم فيديوهات زيزو، على التيك توك وهو بيجري في الجبل، أنا عاوز أشوف زيزو في الملعب ماليش دخل أنا بالتيك توك والسوشيال ميديا، أنا عاوز أشوف زيزو، في الملعب خليك مع المنتخب وفرقتك وبلاش الحاجات الخارجية لأنها مخلياك مش قادر تجري بتحس وانت بتجري رجيلك تقيلة، تقل الرجل بيخليك تقيل في الملعب مش قادر تجري معندكش مرونة في الملعب».
وأتم: «سيبك من الحاجات الشو، لأنها مش حلوة، أنت لعيب كورة أنا عاوز أشوف زيزو ومهاراته في الملعب».