دورة رمضانية.. لن تشاهدها إلا على صفحات "روزاليوسف".. نادى «الفرن»

ذهبنا إلى المعادى للقاء المغامرين الخمسة
وتختخ أطلق زنجر وراء مو سنية
دخلنا ننام عشان نستعد لماتش بكرة مع مركز شباب الجزيرة ما عدا كابتن الشبراوى ومو سنية والكابتن الخطيب اللى راحوا يشيشوا ع القهوة.
أنا كان معايا شنطة فيها جنب الهدوم كام كتاب أنا بحب أقرأ قبل ما أنام ولقيت كابتن الشبراوى داخل عليا وأنا بقرأ وقاللى لسه برضه مش عايز تسمع الكلام أنا بصيت فى الأرض ومعرفتش أرد وافتكرت موقف مشابه حصل معاه ورجعت بالذاكرة فلاش باك.
للأمانة أحد أهم مميزات المدير الفنى الناجح معرفته بقدرات لاعبيه وإمكانياتهم ومتابعة اللاعبين فى شئون حياتهم ولو يورجن كلوب كان بيعمل ده فى ليفربول مع مو صلاح فكابتن الشبراوى عكوز سبقه بسنوات يعنى مثلا كان بيلاحظ إنى مجهد فى التمرين ودايما باتاوب وعنيا حمراء والرجل بروح المدرب الواعى تقصى الحقائق وعرف إننى أسهر يوميا اقرأ قصص أجاثا كريستى وأرسين لوبين الكابتن نادانى وأنا بعمل إحماء مع الفريق فى الوسعاية استأذنت طبعا من كابتن مو سنية بصفته كابتن الفريق اللى كان بيقود الجرى حول تراك الوسعاية وهو حاطط السيجارة السوبر فى بقه المهم رحت للكابتن الشبراوى قاللى اقعد جنبه على كومة الشرب وعزم عليا بعود قصب أحمر ولقيته بيقولى: إنت اليومين دول مش عاجبنى ليه بس يا كابتن
شكلك مابتنمش وعنيك حمراء وعمال تتاوب وأنت واقف
أصلى بسهر بالليل أقرأ يا كابتن
أنت مش عارف أن القراية متعبة للعينين
أيوه باكابتن بس أنا مبعرفش أنام من غير ماأقرأ
وبتقرا إيه إن شاء الله
يعنى أحيانا ارسين لوبين أو أجاثا كريستى أو تشارلز ديكنز
يعنى بتقرأ لناس كافرة أنا فاكرك بتقرا قرآن
ما أنا بقرأ قران يا كابتن بس دول روايات
شوف يا ابنى أنا اخترتك أنت وسمير عبدالهادى من الناشئين الصغييرين وحاطط عليكم أمل كبير تكونوا نجوم البلد فى المستقبل ومش عايز تضيع كل ده عشان الكتب والكلام الفارغ ده
يعنى أعمل إيه يا كابتن
شوف سمير ماشاء الله مركز فى الكورة
بس سمير سقط السنة دى ياكابتن
يعنى ياخويا المدارس ولا التعليم بيعملوا إيه سمير شغال خراط ويوميته 100 جنيه ركز يا ابنى فى الكورة وبلاش تضيع وقت فى القراية والكلام الفارغ ده.
رجعت التمرين ألف تراك الوسعاية وراء سمير اللى مولع سيجارة بلمونت وبيسابق كابتن مو سنية فى التراك. كلام كابتن الشبراوى كان بيرن فى ودانى وأنا مروح البيت مبصيتش على الكتب خالص حتى لما جيت أنام ما اخدتش معايا كتاب فضلت اتقلب مش عارف أنام ساعتين ولقيت نفسى رايح اجيب قصة سجين زندا وبدأت أقرأ وبعدين افتكرت كلام كابتن الشبراوى وأن دول كفار ماينفعش نقرا ليهم قفلت الرواية ودورت فى الكتب لقيت رواية شجرة اللبلاب لمحمد عبدالحليم عبدالله وبدأت أقرأ وأنا ضميرى مستريح الراجل مسلم واسمه محمد وابوه عبدالحليم وخير الأسماء ما عبد وحمد.
تانى يوم وفى التمرين استدعانى تانى كابتن الشبراوى والمرة دى معزمش عليا بالقصب مع أن اللبشة جنبه وقاللى لسه برده سهران تقرأ.
أيوه يا كابتن بس عايز أطمنك المرة دى قريت لناس مسلمين.
ماليش دعوة إن شالله يكون شيخ الأزهر نفسه أنا حذرتك وأنت مابتسمعش الكلام إنت كده مستقبلك هيضيع
يعنى أعمل إيه يا كابتن؟
عايز يبقى عندك مثل أعلى تقلده
زى مين يا كابتن
مش هقولك زيى عشان صعب
أنا قلت فى عقل بالى الحمد لله أنا مش هقطع رجلى تحت القطر عشان أقلده
قاللى عندك مو سنية أنا بجهزك تبقى مكانه فى المستقبل
بس مو سنية ما بيفكش الخط يا كابتن
عنه مافك الخط أنا يهمنى يوصل خط التمنتاشر بسرعة
انتبهت على صوت كابتن الشبراوى وهو بيقول مافيش فايدة فيك يا خسارة
أنا قلت له متزعلش يا كابتن وهتشوف قدامك إنسان جديد بس ممكن اطلب منك طلب
قاللى خير
قلت له لو كسبنا وعملنا ماتش حلو ممكن نعدى على المعادى نفسى أشوف المغامرين الخمسة
الكابتن قاللى واش عرفك أن المعادى دى موجودة فى مصر
قلت له أنا متأكد المعادى دى جميلة فيها مليانة شجر وفيلل وكفاية أن تختخ فيها
قاللى هسأل كابتن الخطيب ولو موجودة هنروحها أهو بدل ما نروح حديقة الحيوان
المهم اتخمد عشان ماتش بكرة
قمنا الصبح فطرنا على عربية فول قدام مركز شباب الحطابة وطلعنا على مركز شباب الجزيرة للأمانة كابتن الشبراوى طلع صادق فى كلامه وبرج الجزيرة لازق فى البرج والنجيلة شكلها يفرح إحنا طول عمرنا بنلعب فى الوسعاية وأرض تراب أول مرة نلعب فى ملعب زى اللى بنشوفه فى التليفزيون.
المهم المباراة بدأت لقينا لعيبة شكلها مستحمى ولابسين طقم فانلات وشورتات وشرابات لونها أبيض واحنا لابسين الفانلات الزرقاء اللى مكتوب عليها نادى الفرن بالأسود واللى لابس شورت واللى لابس بنطلون ترنج وحالتنا صعبة بس للأمانة كابتن الشبراوى بجلابيته وعكوزه كان خاطف الأضواء مننا.
الشوط الأولانى كنا مبسوطين جدا أننا أول مرة نلعب على النجيلة وعمالين نجرى ونقع ومستمتعين بالوقوع على النجيلة والنتيجة الفرقة جابت فينا جون وتقريبا إحنا مالعبناش كنا بنتفرج على الملعب والجماهير وعلى نضافة اللعيبة اللى قصادنا
لدرجة كابتن مو سنية وقف لعيب من الفرقة وسأله انتم جايبين الجاز اللى ريحته حلوة وحاطيته على شعركم منين
والولد معرفش يعنى إيه جاز بس قاله أنا حاطط بيريل كريم
بين الشوطين كابتن الشبراوى عمل فينا نفس اللى عمله كابتن حسن شحاتة مع المنتخب فى مباراة البرازيل لما رمى عليهم التلاجة بس كابتن الشبراوى استخدم العكوز فى توجيهاته
ومو سنية قال للكابتن الشبراوى أنا عايز حق برمب كرين من اللى بيتحط ع الشعر من اللى الواد قال عليه كابتن الخطيب قال أنا هجيب لكل واحد فيكم حق كريم بس المهم نكسب الماتش ده مش بس مدفوع فيه فلوس احنا اتغلبنا من الفرقة دى قبل كده مرتين وأنا عايز آخد بتارى منهم وليكم عليا بكرة اخدكم فى جولة حرة فى العتبة تشتروا اللى نفسكم فيه
نزلنا الشوط التانى أكلنا النجيلة مو سنية تالق كالعادة والبرعى وقراخ وحتى الشتجة طلع كورتين من المقص وأنا جبت جون وكابتن مو سنية جاب اتنين وكسبنا تلاته واحد.
بعد نهاية الماتش مو سنية قال تعالوا ورايا بسرعة وراح قالع الفانلة بتاعته مبدلها مع لاعب الفريق المنافس وإحنا عملنا زيه بالضبط ولما اخدنا فانلات فريق مركز شباب الجزيروة ولبسناها حسينا إننا كنا لابسين اشولة خيش بنلعب بيها.
إحنا كنا طايرين من السعادة وأنا اكتر واحد خاصة لما كابتن الخطيب طلع فلوس من جيبه وأعطى كل لاعب عشرة جنيه وقال لكل واحد عشرة جنيه تانية لما نرجع
ولما كابتن الشبراوى سأله هى المعادى دى فى مصر والكابتن الخطيب أكد للشبراوى أن المعادى دى فى مصر وإنه جاى معانا لغاية هناك عشان يفسحنا هناك وأكد على كلامى إنها منطقة جميلة ومليانة فيلات.
أنا قليى دق بقالى كام سنة أقرأ ألغاز المغامرين الخمسة واسمع عن شارع 9 وكازينو الجود شوت وقصر الصبار اللى فى الشارع المسدود أخيرا هنروح المعادى وممكن أقابل المغامرين الخمسة والشاويش فرقع والمفتش سامى
مو سنية قال مش كنا روحنا جنينة الحيوانات أحسن يا شبراوى
أنا رديت عليه معلش يا كابتن مو أنا نفسى أروح المعادى واشوف المغامرين الخمسة
مو سنية سأل مين دولم لامؤاخذة
قلت له تختح ومحب وعاطف ونوسة ولوزة
مو سنية قال ولوزة دى حلوة يابوب
أنا شعرت بالغيرة بس قلت له دول بيساعدوا العدالة
مو سنية قاللى وهى عدالة عيانة عايزة حد يساعدها
كابتن الشبراوى تدخل وقال خلاص أبو شاهين يعملنا لفة فى المعادى
وصلنا عند سور نادى المعادى وركنا هناك ونزلت الفرقة يقودها كابتن الشبراوى ومو سنية وأنا بجوارهم نمشى بدون هدف أنا متخيل إنى ممكن أقابل تختخ مع المغامرين فى الشارع
وأنا بحكى بعض المغامرات اللى قام بيها المغامرين الخمسة للكابتن الشبراوى وباقى الفرقة لقيت الشنجة بيسال يعنى تختخ اسمه كده عشان عيل فحل وفشلة يعنى
قلت للشنجة ما اسموش فحل اسمه مليان شوية يا شنجة يا اخى الملافظ سعد
لفيت سعيد فراخ بيسال طب والأبلة لوزة والأبلة نوسة أخبارهم إيه حد متكلم عليهم رديت بزهق معنديش معلومة يا كابتن فراخ والله
ماشين بين الفيلات مستمتعين ومنبهرين بفخامة الفيلات والأشجار وفجاة لقينا ولد سمين شوية وماسك كلب أسود فى أيده لقيت مو سنية بيقولى مش ده العيل الفحل اللى بتدور عليه.
وراح منادى واد ياتختخ
الواد بص لنا ب استغراب ولقيت مو سنية بيقول بصوت عالى أنت مش الواد العجل اللى اسمه تختخ.
الولد فك الكلب وسابه علينا وطرنا فى شوارع المعادى والكلب ورانا وكان أسرعنا كابتن الشبراوى عكوز إلى كان أسرع من كارل لويس وأنا وراه وهو بيقول كانت شورتك هباب مغامرين مين وزفت.
ركبنا العربية ورجعنا على بيت الكابتن الخطيب وزع على كل واحد فينا عشرة جنيه والكابتن الشبراوى خد خمسين لوحده وطلع معاه بعد كده على السنترال يكلم الحاج فتيحة الفران
نص ساعة والكابتن الشبراوى راجع مبسوط جدا وهو بيقول استعدوا يا رجالة الحاج فتيحة بيبلغكم أن الاسبوع الجاى هنلعب كلاسيكو القون ولازم ننزل البلد بكرة.
نكمل الأسبوع القادم.
2
3