«بيتهان وهو بيبطل».. تعليق ناري من نجم الزمالك السابق على انتقادات الجماهير ل شيكابالا

علق أحمد غانم سلطان، نجم الزمالك السابق، على الانتقادات التي يتعرض لها محمود عبدالرازق «شيكابالا»، قائد الفريق الأول لكرة القدم بالقلعة البيضاء.
وقال أحمد غانم سلطان، في تصريحات تلفزيونية عبر فضائية «النهار»،: «أي لاعب عمل تاريخ كبير مع ناديه دايمًا تلاقيه بيتهان وهو بيبطل، وده مبيحصلش غير في مصر، هل في لاعب اتعمله ماتش اعتزال من 10 سنين فاتوا؟ ممكن تلاقي اتنين لعيبة بس، أنا آخر واحد شوفته كان حسام غالي، والماتش كان في الإمارات».
وأضاف: «أنا عيشت القصة دي مع حازم إمام الكبير، وعارف إن شيكابالا، هيحصل فيه كده، خاصة أن حازم إمام، كان محبوب عند جمهور الزمالك أكثر من شيكابالا».
وتابع: «شعبية حازم إمام، في الزمالك مفيش زيها، حازم، شعبيته كانت كبيرة في مصر، ومكنش بيتشتم من أي نادي منافس».
وواصل: «الجماهير دلوقتي بتقول شيكابالا بيحتفل ليه، هو قادر يلعب ولا مش قادر»، مضيفًا: «شيكابالا، عنده 38 سنة، مش لازم يلعب 90 دقيقة»، مضيفًا: «دايمًا تلاقي اللعيب كابتن وعامل مشاكل الإدارة بتبقى عاوزه تخلص منه، شيكابالا، مبيعملش كده دلوقتي، هو فاهم أنه مستواه تراجع من الناحية البدنية ودي طبيعة الكورة في أي مكان في العالم، وهو له أدوار أخرى».
وأكمل: «الإعلام يجبر أي لاعب أنه يعتزل، الزمالك لو لم يفوز ببطولة الكونفدرالية كان في لعيبة صغيرة هتمشي، البطولة لما تخسرها بتخلق مشاكل خاصة أنت مبتاخدش بطولة كل يوم».
وأتم: «بطولة الكونفدرالية تخلي شيكابالا، يكمل موسم كمان مع الزمالك. خاصة أنه فنيًا سيصنع الفارق مع الفريق».