ناقد فني عن عصام عمر: «أتمنى يفضل يتعرض عليه أدوار حلوة مع مخرجين شاطرين»

قال الناقد أندرو محسن إن موهبة عصام عمر تأتي في أنه يستطيع أن يضبط انفعالاته، متمنيًا أن يظل يعرض عليه أدوار جيدة ويتعاون مع مخرجين كبار حتي يظل بهذه الموهبة.
وأضاف أندور محسن عبر «فيس بوك» في حديثه عن موهبة النجم عصام عمر: «لما شفت عصام عمر في بالطو، كان عاجبني جدًا، وكنت بفكر هل هو دمه خفيف كده لأن دي شخصيته ولا هو فعلًا عامل أداء حلو. شفته في أدوار مختلفة في كذا مسلسل تاني، بس الدور الأبرز ليه بعد بالطو هو دوره في مسار إجباري، وده دور مختلف تمامًا عن شخصية دكتور عاطف في بالطو، ده أكتر دور أقنعني بموهبة عصام عمر، وإنه شخص بيفهم الشخصيات اللي بيقدمها، وعشان كده بنقدر نصدقه».
وتابع: «مساحة الهزار في شخصية على اللي بيلعبها في مسار إجباري قليلة جدًا مقارنة بشخصية حسين (أحمد داش)، على شخص عقلاني وواقعي جدًا، مش بيهزر كتير، عنده هموم أغلب الوقت، ما بين حلمه بالسفر بره وعلاقته المضطربة مع أبوه، اللي بتزداد سوءًا مع الأسرار اللي بيكتشفها بعد رحيل الأب».
واستكمل: «ممكن في أي وقت نشوف على نعرف إن ده شخص مش مبسوط، عينيه بتعبر عن ده، مش محتاج يعيط ولا يكشر. وحتى لما بيعيط بيبقى بحساب ومع ضغط كبير زي لحظة قراءة وصية الأب مثلًا. وحالة الهم هنا والتعبير عنها مختلفين عن ضيقه من التواجد في طرشوخ الليف في مسلسل بالطو، الأحلى هي اللحظات بيهزر فيها، هو بيهزر بطريقة فيها سخرية شيك، بيهزر بجد إن جاز التعبير، مش زي مثلًا ما كان دكتور عاطف بيتريق أو بيستغرب من الظروف المحيطة بيه في الوحدة الصحية في بالطو، وده مش بس لأن الشخصيتين مختلفتين لكن كمان لأن طبيعة المسلسلين مختلفين، والمخرجين الاتنين (عمر المهندس في بالطو ونادين خان في مسار إجباري) قادرين يطلعوا من الممثل الشعور اللازم للشخصية دي».
وأختتم: «أنا حقيقي مستمتع بأداء عصام عمر، ممثل عارف ازاي يقتصد في انفعالاته ويقدمها بحساب، وأتمنى يفضل يتعرض عليه أدوار حلوة مع مخرجين شاطرين عشان نستمتع بموهبة قدامها كتير».