عبد الرحيم كمال: مسلسل بالطو من آيات الدراما وعبرة وعظة

أشاد الكاتب عبد الرحيم كمال بمسلسل "بالطو" الذى عرض الفترة الماضية عبر منصة Watch it .
وكتب عبد الرحيم كمال على فيسبوك:"اهو مسلسل بالطو ده آية من آيات الدراما وعبرة وعظة ازاي؟ اقولك ازاي ادي القصة ببساطة ومش كدا لا بميزانية محدودة وابطال مش نجوم بالمعنى التقليدي للنجوم ( لكن في نظري انهم نجوم ونص) ومخرج وكاتب لأول مرة وامكانيات ( فنية )عالية ازاي تقدر بدول بس تصنع عشر حلقات ياخدوا الناس ويقعدوهم بتفرجوا مبسوطين من غير دعاية جبارة و من غير ملايين ومن غير ومن غير ومن غير".
وأضاف:" ومع ذلك حقق النجاح الكبير اوي دي . (وبس ده كمان قدر وسط الضحك انه يسخر من (الجهل والدجل وكتير من المعايير المغلوطة ومن غير مباشرة ولا مبالغة ولا فذلكة ولا قلة ادب )، عشان كده المسلسل البسيط ده قدر يکشف بنوره الکثير و الکثير من مشاكل الصنعة".

تصدر مسلسل بالطو تريند مواقع التواصل الاجتماعي بعد انتهاء حلقاته، وحرص عدد من نجوم الفن والنقاد على شكر صناعه وأبطاله وتوجيه رسالة لهم من خلال منصات السوشيال ميديا.
تحية للصناع
أشاد الكاتب محمد أمين راضي بمسلسل بالطو، وذلك عبر صفحته علي موقع التواصل الاجتماعي الشهير فيسبوك.
حيث قال محمد أمين راضي: "بعيدا عن المطب اللي حصل واتكلمت عليه .... بالطو مسلسل جميل.. جميل جدا كمان ... والله متضايق انه خلص ... تحية لكل صناعه و لكل نجومه ... ومبروك يا عصام.
جدية نادرة
وكتب الناقد اندرو محسن: "مسلسل بالطو بالتأكيد من أفضل المسلسلات المصرية اللي شفتها في الفترة الأخيرة، مسلسل معمول بجدية بقت نادرة للأسف، فيه اهتمام حقيقي بكل عناصر العمل، كاست شبه متكامل مع اختيار ممتاز للوجوه الجديدة، الحلقات كلها مكتوبة كويس وممتعة يمكن باستثناء حلقة واحده، السيناريو اللي كتبه أحمد عاطف فياض فاهم طبيعة شخصية نقيض البطل وخلى ده ينعكس على النهاية.
وتابع: "طبعَا المخرج عمر المهندس فاهم طبيعة الكوميديا اللي بيقدمها، وبالتالي مخلي الممثلين أغلبهم ملتزمين بإطار واحد وواضح بتخرج منه الكوميديا المعتمدة على الموقف بالأساس.
وأضاف: "يمكن أكون متحمس شوية زيادة بس كل ما بفكر بلاقي إن ده واحدة من أجمل المفاجآت اللي أشوفها.
مسلسل "بالطو" على مدار 10 حلقات فقط، ويتم طرح حلقتين كل يوم أربعاء، وتدور أحداث مسلسل "بالطو"، في إطار كوميدي حول مهنة الطب، وما يحدث بدور الرعاية الصحية فى أحد المستشفيات، حيث يرصد العمل العديد من الأحداث التي يتعرض لها الممرضون والأطباء في وظيفتهم، بالإضافة إلى رصد تفاصيل حياتهم اليومية.