الأهلي يعترض على الشكل الجديد للدوري.. «شوبير» يكشف التفاصيل

كشف الإعلامي أحمد شوبير حارس مرمى الأهلي ومنتخب مصر السابق عن اعتراض النادي الأهلي على إقامة بطولة الدوري المصري الممتاز في الموسم الجديد بالشكل الجديد الذي أعلن عنه اتحاد الكرة في الأيام القليلة الماضية من خلال بعض البرامج التليفزيونية.
وقال أحمد شوبير في تصريحات إذاعية: «موضوع الدوري العام لما اتكلمت عليه مكانش عندي معلومات، بس قولت إن ما ينفعش القرارات حول شكل الدوري في الموسم الجديد يتم الإعلان عنها من خلال البرامج التليفزيونية».
وأوضح شوبير: «للمرة الألف، لست ضد ما قيل ولست ضد ترتيب الدوري بأي صورة ولكن ضد طريقة اتخاذ القرارات وطريقة إعلانها، لإن بعد اللي اتقال إمبارح فيه أندية موافقة وأندية رافضة».
وتابع شوبير: «إحنا عندنا ناديين هما الكبار في مصر الأهلي والزمالك، ودول كبار بالتاريخ والبطولات وكل شيء، والأهلي قال إحنا رافضين الشكل الجديد للدوري العام، لأن قرار إقامته جاء دون دراسة ودون مناقشات، وإحنا عندنا آفة في كرة القدم المصرية اسمها بالونة الاختبار: ارمي القرار بصورة غير رسمية وأشوف ردود الفعل إيه عليه الأول».
وأضاف شوبير: «لازم لما ناخد قرار يبقى القرار بعد دراسة كاملة عشان لما نطلع بيه ما يكونش فيه أي اعتراض ولا كلام عليه.. وخلي بالك، عمر ما فيه حاجة الناس كلها هتجتمع عليها، فما ينفعش دوري يتعمل بالشكل ده، إنت بتغير نظام كرة قدم كامل في مصر، فلازم تغيره صح مش بالشكل ده».
واختتم شوبير: «يعني لما قولت هتعمل الدوري بالشكل البلجيكي، هل إنت درست الدوري البلجيكي بشكل كامل وعرفت نظامه وكل تفاصيله؟!.. طيب إحنا إجمالي جولات الدوري المصري 34 جولة، الدوري البلجيكي إجمالي جولاته السنة اللي فاتت وهو 18 فريق زينا كان 40 جولة».