زوجي طلقني على الورق عند المأذون ومرماش عليا اليمين.. فهل أنا مطلقة؟ أمين الفتوى يرد (فيديو)

استقبل الشيخ عمرو الورداني، أمين عام الفتوى بدار الإفتاء المصرية، سؤالًا من متابعة لبرنامجه تسأل قائلة: «أختي ظروف جوازها وحشة، وهي عندها معاش أبوها، اتطلقت من جوزها عند الحكومة بس هو مرماش عليها اليمين، هي قانونا مطلقة، دلوقتي حصل مشاكل مع جوزها وهي عايزة تتطلق، تعمل إيه؟».
وقال «الورداني»، خلال برنامج «ولا تعسروا»، عبر قناة مصر الأولى، اليوم الثلاثاء، إن الزوجة في الحالة تعد طالق بالفعل، ولا تحتاج إلى الطلاق مرة أخرى.
وأضاف: «هي مطلقة خلاص، لازم المأذون عشان يعمل وثيقة الطلاق بيخلي الزوج يتلفظ بلفظ الطلاق في مجلس كتابة القسيمة، طالما في قسيمة طلاق يبقى هو طلقها عند المأذون».
وتابع أمين الفتوى: «لازم يكون عند المأذون تلفظ بلفظ الطلاق، وطالما تلفظ يبقى كده خلاص طلقها، وما دام عندها القسيمة دي هي كده مطلقة».
وأوضح: «ولو هو بيقول أنا مرمتش اليمين، يروح هو بقى يرفع قضية على المأذون بإنه لم يطلق، لأن مينفعش المأذون يطلق من غير لفظ الطلاق».